مي كساب: مسلسل «عقبال عوضك» كان عوضي الفني والإنساني بعد صبر 11 سنة
مي كساب: مسلسل «عقبال عوضك» كان عوضي الفني والإنساني بعد صبر 11 سنة
كشفت الفنانة مي كساب عبر صفحتها بموقع التواصل الاجتماعي «فيس بوك»، قصة معاناتها وكفاحها الفني خلال الـ 11سنة الماضية، كما أعربت عن سعادتها بنجاح حكاية «عقبال عوضك» والذي ناقش مشكلة تأخر الزواج وأثره على الفتاة.
وكتبت مي قائلة: «الكام يوم اللي فاتوا كانوا أطول مدة أقعدها لوحدي في حياتي، وباعترف شفت الحقيقة الكاملة، حقيقة نفسي حقيقة كل حاجة حواليها، وعرفت قيمة كل حاجة، وندمت على كل لحظة ظلمت فيها نفسي أو ظلمت حد من اللي بحبهم وبيحبوني، اللي بتكتب دلوقتي مي بس بتاعة 2010، بس بمخ العشرين سنة اللي اشتغلت فيهم ونجحت وأخفقت بسبب ظروف وأوضاع اتفرضت عليا».
مي كساب تكشف قصة كفاح 11سنة
وأضافت «بس الحمد لله راضية تمام الرضا على كل ابتلاء وكل مشكلة اتحطيت فيها، لأن في الآخر ربنا سبحانه وتعالى كان بيحلهالي في الآخر عشان أقدر نعمه، أنا عدى عليا 11 سنة صعبين جدا، يمكن القريبين مني عارفين أنا استحملت إيه وواجهت إيه، أنا مسحت كل لحظة مش عاوزة أشوفها تاني عشان بتفكرني أني كنت مش أنا، وسببت كل لحظه وكل عمل وكل صورة بتعبر عني وعن اللي جوايا، وعن أكتر حاجات مأثرة جوايا كفنانة وكإنسانة، ومسحت كل صوري العائلية ولو إن دي مش أنا لحد ما أرجع أنا وأسجل لحظاتي الحلوة مع عيلتي الجميلة، أكبر نعمة من رب العالمين، جوزي وأولادي وأهلي وأصحابي وزملائي رفاق الرحلة الأوفياء الصادقين، السند والضهر اللي خلاني أعرف أعدي الـ 11 سنة دول».
مي كساب: أحاول محاربة كل روح شريرة
واختتمت «باعترف عقبال عوضك كان عوضي الفني والإنساني بعد صبر 11 سنة، حبيت أفضفض معاكم وأطلع اللي في قلبي عشان دي أنا بأحكي اللي جوايا عشان نيتي بتكون إن اللي مريت بيه يكون مفيد لغيري ويتعلم منه حاجة تأثر فيه وتغيره للأحسن وبإذن الله العلي الكريم أنا هارجع أنا وهأحارب وأقاوم كل روح شريرة وكل طاقة سلبية أثرت عليه في السنين اللي فاتت، وربنا يقدرني وأكون إنسانة صالحة وفنانة صاحبة رسالة وأكون خير في الدنيا، بحبكم من قلبي وحقيقي حبكم ليا هوه الحياة»
حكاية «عقبال عوضك»
ولاقت حكاية «عقبال عوضك» من مسلسل زي القمر نجاح كبير والحكاية من بطولة «محمد جمعة، إيمان السيد، هالة فاخر، محمد حسني، رباب ممتاز، راندا عبدالسلام، محمد حكيم، أحمد جمال سعيد، محمود عامر، سمر عبدالوهاب».
