«هنولعها» سباق سيارات عشوائى.. لو جاى تتفرج «اقف بعيد لتتعور»

«هنولعها»، عنوان الدعوة التى أطلقتها مجموعة من هواة قيادة السيارات، لإقامة سباق بشارع سوق السيارات فى مدينة نصر، ذلك الشارع الذى اعتاد سكانه صف سياراتهم داخله لكن السباق كان سبباً فى خلق حالة من الضيق لأهالى المنطقة بسبب الإزعاج ورائحة الغبار المنتشرة فى المكان بحجة الاستمتاع بأجواء العيد على طريقتهم الخاصة التى تعرض حياة المارة والمتفرجين للخطر فى حالة خروج أى سيارة عن السيطرة. «وأنت بتتفرج اقف بعيد عشان متتعورش»، التحذير الذى أرفقه شباب السباق بالدعوة على موقع «فيس بوك» للمتفرجين على السباق الذى يفرض على السائق المشترك دفع 20 جنيهاً لحجز مساحة من الشارع رغم كونه ملكاً للجميع، تفاصيل يسردها «عمرو طارق»، المتحدث الإعلامى باسم فريق «Drift Wolves» للسباقات الرسمية التابعة لنادى السيارات، بعد أن حاول هو وباقى شباب الفريق محاربة تلك الدعوات العشوائية لما تتركه وراءها من خطورة، يقول عنها السائق العشرينى: «أولاً محدش فيهم ملتزم بارتداء خوذة، ثانياً اللى بينظم المسابقة مجهول الهوية، يعنى لو عربية خرجت عن السيطرة وخبطت شخص مش هيلاقوا اللى يحاسبوه، لأن اللى بينظم السباق بيعمله عشان يلم فلوس». خالد مصطفى، المتحدث الإعلامى باسم محافظة القاهرة، يؤكد أن تلك السباقات غير مصرح بها فى مصر، وتعرض صاحبها فى حالة إبلاغ السكان للمساءلة بتهمة الإضرار بالطريق العام، وتعريض حياة الموطنين للخطر «إحنا مش فى بلاد برا، الطرق فى مصر مش مؤهلة لممارسة السباق، وللأسف الشباب بيأخذ أسوأ ما فى الغرب كنوع من التقاليع.. ولازم السكان تتعاون وتبلغ عشان الظاهرة دى يتم القضاء عليها».