خالد حنفى رئيساً للحكومة
رحلة منظمة إلى روما، وبالمركب لبرشلونة.. ينضم إلينا أسرتان لمصريين مقيمين بإيطاليا.. المقيمون بإيطاليا يضعون «علم» مصر حول أعناقهم، وأطفالهم رسموه بالألوان على وجوههم.. ثم طلبوا من سائق الأوتوبيس الذى يقلنا من روما إلى كابرى تشغيل سيديهات حملوها معهم لأغانٍ وطنية مصرية.. وفى انتظار الصعود إلى السفينة دار أول حوار فى هذه الرحلة، أنقله لكم نصاً:
> أحد المغتربين: بنرحب بحضراتكم على أرض إيطاليا.. وبنفخر بأننا مصريين، بعد ما بقى لنا «قيمة»، وسعرنا فى البورصات العالمية «ارتفع»، وقدرنا نرفع راسنا تانى ونقول «المصريين أهمه».. بعد ما كنا أيام مبارك مانساويش 3 تعريفة، وجه مرسى طيّنها، وخلانا نتكسف نقول إننا مصريين، وكان مهزأنا فى كل حتة..
> واحد من المقبلين معنا من القاهرة، بصوت عال: البركة فى السيسى حبيبنا، وتاج راسنا.. ربنا يكرمه، رفع راسنا وعمل لينا «سعر» وكرامة.. شوف خطابه فى الأمم المتحدة (تسلم إيد اللى كتبه)، وشوف كل الناس اللى كانت بتزوره وتقابله، والفرق بينه وبين المجنون بتاع تركيا، اللى عايز يعمل فيها «كبش» وفاكرنا كلنا خرفان.
> زوجة المغترب: أنا باعشق السيسى.. بس صعبان علىّ قوى.. يا عينى مقطع نفسه، وشغال ليل نهار، وشايل الهم لوحده، أنا مش عارفة ده بينام إزاى، وكل الهموم دى فوق دماغه..
> واحد بيقاطع: ما هى دى المشكلة.. هو ليه مش عايز يجيب «مساعدين» يعاونوه؟.. ناس تقول لك: أصله من كتر اللى شافه من «المدنيين» وفسادهم، وعدم انضباطهم.. والسياسيين عندنا معظمهم «أفاقين»، والأحزاب ورق، والشباب ماعندهمش أى خبرة، ومحتاجين تدريب.. هيجيب منين مساعدين غير اللى يعرفهم من الجيش؟
> واحد تانى: ياعم اللى يدور هيلاقى.. ما انت عندك وزرا ممتازين زى بتاع التموين، وبتاع الأوقاف، والمالية والتخطيط والاتصالات وغيرهم.. شوف «الخارجية» والشغل الرائع اللى عملوه فى زيارة الرئيس لأمريكا.. تنظيم - إعداد - حتى المراسم والترتيبات.. لغاية اللبس والمظهر بتاع الريس.. كل حاجة صح 100%.
> واحد من أول الرحلة مانطقش: أنا زى زوجتى من عشاق السيسى بس مش فاهم.. هو ليه ما يغيّرش الحكومة دى.. ولو عايز يسيب «محلب» عشان راجل طيب ومخلص ومقطع نفسه 24 ساعة.. ماشى، بس يجيب له نواب ومساعدين ووزرا غير دول، لأن السيسى اللى طرح تصورات كاملة لمستقبل مصر الجديدة، وعامل مؤتمر دولى للاستثمار بعد انتخابات مجلس الشعب.. وعايز يطير بمصر، عنده حكومة معظم اللى فيها حسنى مبارك ماكانش يرضى يشغلهم سكرتارية.. شوية وزرا ومحافظين على ما تُفرج، إيديهم فى ميه باردة، ماعدا كام واحد.. زى وزير التموين خالد حنفى عنده «رؤية» وبيفكر خارج الصندوق، وعنده حلول -شوف منظومة العيش- والتموين، وبيقدم «مبادرات» إن مصر تبقى مخزن الحبوب للمنطقة.. وبورصة الحبوب والتخزين والتوزيع تبقى فى قناة السويس.. والله ينفع رئيس وزرا ١٠/١٠ فى الفترة الجاية.
> واحد بيرد عليه: عارف المشكلة فين؟؟
> ماعندناش «قاعدة بيانات» لأى حاجة.. لا تعرف عدد المصريين بالخارج كام، عشان تعمل خطط وسياسات، ولا نعرف عن المميزين والموهوبين حاجة رغم إن البلد أكيد فيها عقول وناس كويسة.. عشان كدة شغلنا كله عشوائى.. لكن أنا معاك «خالد حنفى» بتاع التموين ينفع قوى رئيس حكومة ممتاز ويجيب شباب زيه عندهم أفكار - مبدعين - خلاقين - مبتكرين، ويجيب محافظين سوبر على الفرازة، ويديهم صلاحيات كاملة.. يعنى كل محافظ يبقى رئيس جمهورية محافظته، يعمل مشروعات تشغل الشباب، يحل مشاكل الناس.. الناس اللى حالها بقى يصعب على الكافر، ولولا حبهم وثقتهم فى السيسى كانوا انفجروا، وطردوا معظم المحافظين العرر، اللى ماينفعوش بنكلة، ده فيه محافظ بيدير المحافظة البحراوية من القاهرة، ومحدش دريان، ولا حد واخد باله أن الوضع الداخلى من سيئ لأسوأ، ومحتاج مجهود ومبادرات وقرارات.. وممكن «محلب» يبقى مساعد لرئيس الجمهورية للإشراف والتنسيق والمتابعة على المشروعات الكبرى، لأنه عارف دولاب الحكومة ومشاكله. مداخلة من سيدة قالت إنها طبيبة:
> «بقول لكم إيه.. كفاية كلام.. وسيبوا السيسى حبيبنا يشتغل، وهو عارف مين الكويس واللى ينفعنا الفترة الجاية، وإحنا علينا كلنا نساعده.. وهو أكيد هيمشّى الكام وزير ومحافظ الخيبانين دول.. بس نديله فرصة.. ده بقاله 3 شهور، وكفاية إن كل مصرى ومصرية فى أى مكان بقى فخور بمصريته، وآديكم شايفين الأطفال والشباب اللى عايشين فى أوروبا وأمريكا قد إيه فرحانين ورافعين راسهم فوق.. وزى الأخ المغترب ما قال: سعر المصرى فى بورصات العالم ارتفع وبقى له قيمة كبيرة، وعموماً: طول ما السيسى موجود ما تحملوش هم.. هو يقدر يعمل كل حاجة..
> مقاطعة: ليه هوه السيسى سوبرمان؟.. والتسعين مليون فيهم 80 مليون مأنتخين، وفاكرين إن السيسى معاه خاتم سليمان وعصا موسى؟. ده غير «المؤامرات» من الإخوان اللى ماليين البلد إشاعات كلها كدب، والجهاز الحكومى الخربان، كمان تشريعات فاسدة، وسياسات وبرامج مالهاش أى علاقة بالعدالة الاجتماعية، وأغلبية الناس اللى تحت قليلة الحيلة، والأسعار مع جنان فواتير الكهربا بتحرق جيوبهم.. وأصحاب المعاشات (حد يعرف يعيش بخمسمية جنيه فى الشهر؟)
> عايز أقول: الوقت كالسيف.. حركة المحافظين ضرورة ملحة.. والتغيير الوزارى أصبح مطلوباً.. ولازم كل واحد فينا يخلّى عنده «دم» ويساعد على قد ما يقدر، مش بالكلام، ولكن بالأفعال.. لأن العالم كله بيتفرج علينا، وعلينا أن نثبت لنفسنا ولهم إننا من نسل الفراعنة ومش صحراويين ولا «برابرة»، وإننا قدها وقدود.
> وقبل الصعود إلى السفينة ردد الجميع تحيا مصر.. تحيا مصر.. تحيا مصر.. والخواجات حوالينا بيبتسموا ومش فاهمين أى حاجة.
