3 أزمات لتامر حسني مع النجوم على «سوشيال ميديا»: ماتبعتولي

07:32 م | الخميس 15 يوليو 2021

لم تكن مشكلة تامر حسني وحلا شيحة، بعد طرح فيلم «مش أنا»، وأغنيته الجديدة «بحبك»، الأولى من نوعها لـ«نجم الجيل» مع فنانين استخدموا مواقع التواصل الاجتماعي في إشهار الخلاف معه أمام الجمهور، وهو الأمر الذي علق عليه تامر حسني في كل أزمة منها، بأنه كان من المفترض أن يتواصل الفنان الآخر معه، والتحدث بشأن الخلاف، بدلاً من مشاركته على الـ«سوشيال ميديا».

أزمة تامر حسني مع زوجته بسمة بوسيل

كان الخلاف الأول بين تامر حسني، وزوجته المغربية بسمة بوسيل، في نوفمبر الماضي، بعد غضب زوجته من صوره مع المعجبات، لتكتب عبر حسابها بموقع «إنستجرام»: «كل الناس اللي بتبعت لي صور وفيديوهات لتامر وشايفة إنه مش بيعمل لي احترام سواء في صور أو فيديوهات، ياريت تبطلوا تبعتوا لي أي حاجة عشان مش فارق لي أي صور»، واستكملت: «أحب أعرفكم إن إحنا بقالنا فترة منفصلين وبنحضر أوراق الطلاق، يا ريت تحترموا مشاعر كل واحد فينا وبطلوا على الأقل تبعتوا لي أي حاجة.. بالتوفيق».

وبعد تدخل كبير لعدد من نجوم الفن للصلح بين تامر وبسمة، تصرف «نجم الجيل» بذكاء حسبما علق الأغلب وقتها، حيث كتب منشورًا كبيرًا عبر صفحته الرسمية على «فيس بوك»، من بينه: «بسمة حبيبتي للأسف انتي مافكرتيش كويس وسلمتي ودنك لشر السوشيال ميديا، علشان كام تعليق كلامهم فارغ، نسيتي إنك عرفتيني وأنا مشهور ودي طبيعة شغلي اللي عرفتيني وحبتيني بيها، إزاي وصلوكي للزعل والبعد فترة»، واستكمل: «المهم أنا مش هزعل منك ولا يرضيني زعلك، انتى حبيبتي وأم ولادي وأنا ضهرك وسندك مهما حصل».

ووجَّه تامر حسني في نفس المنشور نصيحة للجميع: «ليه لما أي حد بيزعل من أي حد بيطلع يكتب عليه في السوشيال ميديا، طب حتى يكلمه الأول، إيه علاقة الناس بمشكلة شخصية بين اتنين ممكن تتحل بالتليفون، أو في زيارة رحيمة ما بينهم، وياريتها مشكلة أصلا»، واختتم بالجملة التي انتشرت وقتها: «متهورة بس بحبك».

خلاف تامر حسني مع أحمد السقا

وفي خلاف آخر لتامر حسني مع الفنان أحمد السقا، بعد ظهور الثاني في حلقة ببرنامج «السهرة»، مع الإعلامية وفاء الكيلاني على قناة «DMC»، متحدثًا: «أنا زعلان من تامر حسني، أنا بحب تامر جدًا ولو مش بحبه مش هزعل منه»، موضحًا أن سبب الخلاف بعد ظهور «السقا» ضيف شرف في فيلم «الفلوس» لتامر حسني، ليرد الجميل لـ«نجم الجيل» بعد ظهوره في مشهد بمسلسل «ولد الغلابة» لـ«السقا».

وأوضح «السقا»، أنه فوجئ بنزول صورة للفيلم توضح أنه من بطولة تامر حسني وأحمد السقا، وبعد حديثه مع «نجم الجيل» ذكر أن الصورة من تصميم المعجبين ليس إلا، لافتًا إلى أن ذلك التصرف أثر على عمله.

وعلق تامر حسني على حديث «السقا» بمنشور على «فيس بوك» بنفس طريقة أزمته مع بسمة بوسيل: «حبيبي وأخويا وصديق العمر ونجم الدنيا كلها أحمد السقا، كنت أتمنى إنك تكلمني بيني وبينك، ولو كنت زعلان من أي حاجة أو فاهم أي حاجة غلط، لأن الحاجات دي لا يمكن تفوتك، وأنا كنت أتمنى ماكتبش الكلام ده هنا، بس عشان بعد كلامك في التليفزيون، الجمهور الكريم بقى ليه حق إنه يفهم الصح».

واستكمل «تامر»: «عشان أفكرك بس، أنت كلمتني وقلت لي فيه خبر في موقع، وعليه صورة افتراضية للفيلم، وكاتبين أنك بطل في الفيلم، وأنا رديت عليك إن دي اجتهادات صحفية والصورة من تصميم محبين اللي أكيد فرحوا بالخبر إننا مع بعض، حتى أنا مقولتش إن دي الشركة المنتجة، لأنها شركة كبيرة، ولا يمكن تعمل كده، لأن الفيلم متباع للخارج والداخل باسم أخوك تامر حسني، نزل والناس كلها شافته، وأنت مش فيه ولا فيه اسمك، كل الأبطال طالعين مرسومين، ومعرفش زعلك من إيه الحقيقة، كان ممكن تزعل لو الكلام ده نزل على صفحتي أو صفحة الشركة المنتجة».

وأضاف: «أنا شرحتلك ده من سنة واتكلمنا بعدها، مرة عيدت عليك في عيد ميلادك والتانية بخصوص برنامجك، ولو كنت لسه زعلان كنت هتقولي ساعتها، الفيلم بقاله سنة يا أحمد، إنت حبيبي يا أحمد وصديق عمر، عشان كدا أنا اللي مش هزعل منك، معلش طولت في الكلام، لأن برضو زعلك يعز عليا».

اعتذار «السقا» لتامر حسني

ورد «السقا» على منشور تامر حسني: «رسالة إلى صديق عزيز، صديقي وأخي العزيز تامر حسني، إنت عارف اللي بيني وبينك عيش وملح وحاجات كتير، قد أكون أخطأت إني اتكلمت في الموضوع على الهوا، ولكن يعلم الله كم كنت مجروحا وكم كنت حزينا، واستكمل: «مش هاطول عليك أكتر من كده ولو أنا زعلت شوية وانت شوية نبقى خالصين يا عم، تامر حسني إحنا اللي بينا كتير ماتزعلش يا عم وحقك عليا، وميعادنا الحفلة اللي جاية».

حلا شيحة تتبرأ من فيلم «مش أنا»

وخلال الساعات الأخيرة كانت أزمة تامر حسني وحلا شيحة هى الأكثر تداولا على مواقع التواصل الاجتماعي، بعد أن علقت الفنانة المعتزلة على فيديو كليب «بحبك» من فيلمها مع تامر حسني «مش أنا»، بمنشور عبر حسابها، يتضمن تبرأها من الفيلم والأغنية، وأنها بكت بعد رؤية نفسها فيه، لافتة إلى أن «نجم الجيل» لم يحترم رغبتها في حذف مشاهدها، بينما رد تامر حسني عليها بأنه كان يرغب في أن تتحدث معه بدلا من الحديث على «سوشيال ميديا»، وأنه حاول أكثر من مرة الوصول لها لمراجعة مشاهدها في الفيلم، إلا أنا كانت تغلق هاتفها، وترفض الحديث معه ومع صناع الفيلم.

وأضاف: «أولاً أنا عمري ما وعدتك إن الكليب مش هينزل دا محصلش أصلاً يا حلا مش أنا خالص اللي أوعد و أخلف، الحقيقه إني إحترمت كلامي معاكي، وعدتك أشيل مشاهد تانية طلبتيها وشيلتها بالفعل وشكرتيني عليها ولو حابة تفتكري المشاهد اللي اتشالت بعد إذنك روحي شوفيها في المونتاچ عند الأستاذ عمرو عاكف أو كلميه يبعتهالك كلها موجودة»، وتابع أن الفيلم موجود في السينمات منذ أسابيع، ولم تتحدث «حلا» عنه، وأنها تعاقدت على الفيلم بأجر كبير وهى على علم بجميع تفاصيل الدور.