قبل فرحها بـ3 أيام.. حريق يلتهم عفش عروس بالفيوم

09:05 م | الاثنين 24 مايو 2021

مثل أي عروسة طالما تحلم بحفل زفافها، لتطل بالفستان الأبيض «المنفوش» الذي اختارته لهذا اليوم خصيصًا، وكان موعده يوم الخميس المقبل، حتى حدث ما لم تتوقعه وانتهت فرحتها في لحظة، فقد استيقظت على حريق هائل في جهازها «العفش» ومفارش عش الزوجية الجديد.

استيقظت أسماء عرابي 18عامًا، من محافظة الفيوم، اليوم، على رائحة حريق قضت على عفش شقتها الجديدة، ودخان هائل إثر احتراق عفشها بالكامل، ولم يتبقَ منه سوى رماد وبقايا هشَّة: «الغسالة والبوتجاز والتلاجة والمطبخ والمفارش والمراتب والستاير والسجاد كل ده النار كلتوا، فرحتي كلها واليوم اللي كنت مستنياه راح في غمضة عين والنار كلت كل حاجة ومقدرناش ننقذ أي حاجة خالص» بحسب أسماء العروس.

وتقول «أسماء» إنها كانت تحتفظ بعفش منزلها الجديد في شقة بالدور الأول تابعة لأسرتها، وفجأة استنشقت رائحة دخان حريق وهي نائمة، حتى وجدت منظر النار تشتعل في عفشها: «ده أنا ملحقتش أتجوز ده أهلي دفعوا دم قلبهم عشان يجيبوا العفش ونص جهازي خلص بالقسط ولسه بندفع الأقساط وملحقتش حتى أتجوز عليه وكله اترمى وراح في الأرض».

نكبة ومصيبة حلت على العروس، ويقول محمد عرابي شقيقها: «سبب الحريق مجهول لغاية دلوقتي ورفضنا تقديم شكوى لأن محدش مننا أتصاب، ولكن رغم أنه ما أصبناش بضرر جسدي، لكنه قتل فرحتنا وفرحة أختي وعريسها ومحدش فينا قادر يقعد على بعضه وأختي منهارة بسبب العفش اللي راح هدر ومش عارفين نلم حقه»، ولا يجد «محمد» أي سبيل لتهدئة العروس، فقد دخلت في انهيار عصبي جعلها تشعر بحالة من الحزن الشديدة: «أختي وخطيبها هيموتوا من الحزن والفرح هيتأجل بدل ما كان هيبقى الخميس الله أعلم ممكن يتعمل امتى، بس ربنا كريم ولو لاقينا اللي يساعدنا هنعمل الفرح في ميعاده زي ما هو».