أحمد شاكر: الخائن عويس كان دفعة البطل محمد مبروك ونفس سريته.. فيديو
أحمد شاكر: الخائن عويس كان دفعة البطل محمد مبروك ونفس سريته.. فيديو
قال الفنان أحمد شاكر، إنه جسد شخصية الخائن محمد عويس بمسلسل «الاختيار2» وجسد دور الخيانة الغير متوقعة ومن شخص قريب، خان نفسه ووطنه وأسرته، لافتا إلى أنه استعد للدور جيدا، وقال:«كان يهمني فكرة الخيانة وإزاي أقدر أقدم شخصية بعيدة عن شكلي وملامحي وبعيدة عن الأدوار اللي كنت عاملها قبل كدا من أدوار قدوة وأدوار طيبة وبعيدة عن شكلي وملامحي، وكنت أحرص على أني أبين الشخص الخائن ده، ده شخصية مركبة جدا وعنده إحساس بالنقص ومش مكتفي بحاجة وباصص للآخرين ومشتت ومعندهوش انتماء وممكن أي حد يلعب في دماغه، وهو كان شخصية مركبة جدا».
وأضاف شاكر، خلال حديثه مع الإعلامية خلود زهران، على شاشة «إكسترا نيوز»، « استعديت كويس للدور وجبت كل ما كتب عنه واستعديت كويس للمحاكمة نفسها، وجبت فيديوهات ليه وهو بيتكلم، وكنت محظوظ إني قابلت ناس من أصدقائه من الدفعة واتكلمو عنه واتكلموا عن الشهيد البطل محمد مبروك، وحكولي تفاصيل إنه محمد مبروك كان بيعطف على محمد عويس وكان واقف معاه خصوصا وأنه محققش نفس النجاح اللي هو حققه».
وتابع شاكر «البطل محمد مبروك والخائن محمد عويس كانوا نفس الدفعة ونفس السرية وأكلين شاربين عند بعض، وكانت علاقتهم علاقة الصديق الصدوق اللي مينفعش يضحي بيه، وكان كل ده لازم يترجم في الأداء التمثيلي»، كاشفا عن كواليس مشهد عزاء الخائن محمد عويس بعد استشهاد البطل محمد مبروك، «دكتور بيتر ميمي سألني هعمل المشهد إزاي، وقالي عاوز أحس إنه بجد أوي، والمشهد ده كان تمثيل جوة التمثيل، المشهد ده كان داخل عنده إحساس بالخوف، وعنده رغبه إنه يأفور في حزنه علشان ينفي أي شبهات، المشهد ده أخد تحضير كتير ومجهود كبير، والدكتور بيتر ميمي كان مبسوط جدا بالمشهد، وحسيت إنه كان عاوز يقول لي إنه رهانه عليا جه في مكانه».
