الركود يضرب سوق الجمعة.. ومزادات «أون لاين» لبيع الحيوانات
الركود يضرب سوق الجمعة.. ومزادات «أون لاين» لبيع الحيوانات
يشهد سوق الجمعة بمنطقة مصر القديمة حالة من الركود بسبب حلول شهر رمضان واهتمام الجميع بشراء المستلزمات الضرورية، وهو ما دفع التجار إلى بيع الحيوانات «أون لاين» فى محاولة تقليل الخسائر التي تعرضوا لها خلال الفترة الماضية، حيث يتم البيع من خلال مزاد أونلاين ويتم وضع سعر مبدئي، ثم فتح المزاد لمن يريد الشراء، علي أن يكون التوصيل علي نفقة «الزبون».
ركود في سوق الجمعة بسبب كورونا
يرى حسني كوبرا، من منطقة شبرا، أحد تجار السوق، أن تفشي فيروس كورونا وحلول شهر رمضان، تسببا في ركود حركة البيع داخل السوق، الأمر الذي كلفهم الكثير لأن جميع الكائنات التي يقومون ببيعها تتناول طعام يومي، يكلفهم اموالا مرتفعه، ما يجعلهم يرغبون في سرعة بيعها لتقليل المصروفات: «بياكلوا كتير طبعا، وكل حاجه دلوقتي بقيت غالية، علشان كده لازم نبيعها في أسرع وقت ممكن، علشان نقلل المصاريف شوية».
لم يكن أمام «حسني» سوى السوشيال ميديا لتسويق المنتجات دون تكلفة: «أنا من شبرا الخيمة، علشان أروح السوق بدفع مبلغ كبير علشان بجيب عربية مخصوص تنقل الشغل لحد هناك، ودي بتكون مصاريف إضافية أكيد، لكن لما بعمل بوست علي الفيس بوك، مش بيكلفني حاجة، والتوصيل بيكون دليفري على حساب الزبون مش علي حسابي، يعني أنا كده بكسب أكتر».
وأشا إلى أن هناك العديد من أنواع الحيوانات التي يقبل علي شرائها الزبائن علي الرغم من كونها ذات سمعة غير طيبة، ربما لأسباب تعود لشكلها أو لعدم جدوي تربيتها: «فيه ناس بتحب تشتري الغربان، ودي حاجة من وجهة نظر ناس كتير غريبة، علشان الغراب مش من الطيور اللي الناس بتحبها، وكمان البومة فيه ناس كتير بتطلب تشتريها، علي الرغم من سمعتها الوحشة وأنها بتجيب النحس».
البيع أون لاين ينقذ تجار سوق الجمعة من الخسائر
ويرى أحمد عيسي، تاجر من منطقة إمبابة أن فيروس كورونا أفقد سوق الجمعة أهميته وقدرته علي جذب الزبائن، لأنهم يخشون علي أنفسهم من انتقال الفيروس إليهم بسبب الزحام الشديد داخل السوق: «مبنقاش نعرف نشتغل زي زمان، السوق مبقاش فيه حد بيشتري، علشان كده كلنا اتجهنا للفيس بوك، نعرض عليه شغلنا، النهاردة الناس بتشتري ياميش وقطايف مش نسانيس وكلاب، علشان كده كلنا بقينا نفضل نعرض الشغل علي الفيس بوك، وعلي الاقل لو، معرفتش أبيع مش هبقي خسرت فلوس النقل».
وأضاف أنه يأمل في تحسن الأوضاع داخل السوق بعد انتهاء شهر رمضان: «المبيعات بتزيد بعد رمضان، بشكل كبير، لأن فيه ناس كتير بتبقي عايزه تربي حيوانات».
