أندرو محسن يشيد بمشهد ولادة منى زكي في مسلسل «لعبة نيوتن»: «كله توتر»
أندرو محسن يشيد بمشهد ولادة منى زكي في مسلسل «لعبة نيوتن»: «كله توتر»
أشاد الناقد الفني أندرو محسن، عبر حسابه على فيس بوك، بمشهد ولادة الفنانة منى ذكي، خلال أحداث مسلسل «لعبة نيوتن».
وقال «محسن» إن مشهد ولادة «هنا» التي تؤدي دورها منى زكي، في مسلسل «لعبة نيوتن»، به أكثر من مشهد جميل ومؤثر، مضيفا: «طبعًا أداء منى زكي من أبرز العوامل دي، مش بس الخوف والتوتر اللي على وشها وفي صوتها، لكن حتى في إنها مفقدتش سيطرتها على الكلام بالإنجليزي المكسر بتاعها في وسط المشهد، وفضلت مسيطرة على كل تفاصيل الشخصية».
وأضاف: «اللي خلى المشهد مميز كمان هو رؤية المخرج تامر محسن، ودور المونتير عماد ماهر، في إنهم يخلوا المشهد مش بس حلو، لكن شبه المسلسل كمان. من أول حلقة والتون العام بتاع المسلسل هو التوتر، طول الوقت في حالة من التوتر، سواء من حاجة كبيرة زي الخروج من المطار، أو من حاجة صغيرة زي إنهم ياخدوا مخالفة مرور عشان راكنين غلط».
وتابع أندرو محسن: «الأول المخرج اختار إنه يورينا عملية الولادة، مجابش هنا، بتدخل العمليات وبعدها رجعنا نشوفها بعد ما فاقت وهي بتسأل عن الطفل، وده بالمناسبة كان هيعمل توتر وتشويق عشان مش هنبقى عارفين الطفل عايش ولا مات. لكن بما إن عملية الولادة هي الرابط الرئيسي اللي بيخلي المشاهد متفهم وجود هنا، في أمريكا، هو ده اللي مستني يشوفه، فاحنا لازم نشوف العملية دي، ماينفعش نختصرها».
وواصل: «فيه أكتر من طريقة أكيد لتمثيل عملية الولادة الطبيعية، اللي في الحقيقة حاجة صعبة جدًا، لكن السؤال هو: هنختار أي طريقة؟ أكيد الطريقة اللي تشبه المسلسل، الطريقة اللي تحافظ على تون التوتر. تتابع المستشفى كله من أول ما هنا، بتوصل لحد ما بتخلص ولادة مدته حوالي 8 دقايق، فيهم حوالي 120 قطع (على ما قدرت أعد)، نصهم تقريبًا أو أكتر حصلوا في دقيقتين ونص اللي هما جوه غرفة العمليات. يعني لو قلنا 65 قطع على 150 ثانية، هيطلع إن كان فيه قطع كل نص ثانية تقريبًا».
وعن التصوير داخل المستشفى قال الناقد الفني: «بعيدًا عن تعقيدات الحسابات، الفكرة هنا إننا هنحس إننا كأننا جوه غرفة العمليات، دكاترة بيتحركوا وممرضين بيعملوا حاجات، وفيه أدوات بتطلع وكلام طبي بيتقال وصويت من هَنا، وتوتر، توتر، توتر. دي حاجة صعبة في التنفيذ، لأنها استلزمت تصوير لقطات كتير من زوايا مختلفة، بعضها ثابت وبعضها متحرك، عشان لما تتمنتج في الآخر تظهر بالطريقة دي».
وأضاف: «حاجة كمان تقولنا المخرج ازاي بيحافظ على التون بتاع العمل بالشكل المناسب. على عكس القطعات الكتير اللي جوه العمليات، هنلاقي فيه لقطة بتاعت دخول هنا، المستشفى على الكرسي العجل لحد ما بتوصل أوضتها، دي لقطة واحدة طويلة بدون قطع مدتها حوالي دقيقة كاملة. ليه مفيش قطع هنا؟ أولا لأن فيه حركة والحركة نفسها خلقت التوتر ده، ثانيًا، لما يكون معاك ممثلة تقدر تقدم أداء ممتاز وصعب وتخلق هي حالة التوتر، ليه متستفادش من ده؟».
واختتم: «حاجه أخيرة عن فكرة التون أو المود العام. من كام شهر اتعرض فيلم Pieces of a Woman، والفيلم فيه مشهد ولادة طويل جدًا، حوالي نص ساعة تقريبًا. الفيلم كان عايز يخلي المشاهد يشارك في صعوبة العملية نفسها وفي ثقلها على الأم، عشان كده عملوا عكس اللي شفناه في المسلسل بالظبط، إحنا شفنا النص ساعة دي بدون قطعات، أو باستخدام قطعات خفية، عشان التوجه كله كان مختلف».
مسلسل «لعبة نيوتن» بطولة منى زكي، محمد فراج، محمد ممدوح، سيد رجب، عائشة بن أحمد، مايان السيد، أسامة الهادي، ولأول مرة في الدراما المصرية الممثل المصري الأمريكي آدم الشرقاوي، سيناريو وإشراف على الكتابة مها الوزير، وتضم ورشة السيناريو والحوار الكُتّاب مها الوزير، سمر عبدالناصر، محمد الشخيبي وعمّار صبري، من تأليف وإخراج تامر محسن.
