وزير التعليم: الأول على الثانوية العامة ممكن يجيب 70%

شهدت الجلسة العامة لمجلس الشيوخ اليوم، نقاشات حادة بين الدكتور طارق شوقي، وزير التربية والتعليم الفني، وأعضاء مجلس الشيوخ، خلال مناقشة قانون التعليم، حيث هاجم الوزير رفض النواب للقانون، قائلا: «مينفعش نعمل المناهج زي ما الأهالي عايزين، ومينفعش نسأل عايزين المناهج دي قد إيه، ولا نسأل الطالب تحب نمتحنك ازاي، مفيش دولة في العالم بتعمل كده، وزمن المجاميع الكبيرة انتهى، ممكن يكون مجموع الأول في الثانوية على الجمهورية 70%، وانتهى زمن الـ106%، والأسئلة والمجاميع هتختلف في الثانوية العامة».

وزير التعليم: مبقيناش نطبع كتاب المدرسة.. والمناهج على المنصات التعليمية محدش بيشوفها

وتابع وزير التربية والتعليم، ردا على تعليقات النواب: «مناهج الثانوي اتغيرت، وكتاب المدرسة انتهى، مبقيناش بنطبعه، والمناهج موجودة على المنصات الإلكترونية، لكن محدش دخل عليها يشوفها، ودي مناهج مش موجودة في أي دولة في العالم، ومناهج الثانوية اتغيرت».

واستطرد الوزير: «نقدر نعمل امتحان إلكتروني، الفكرة مش في الامتحان لكن في التصحيح، الكمبيوتر هو اللي بيصحح، وبنحاول نسيطر على الغش الإلكتروني والغش بالكاميرات وغيرها».

شوقي: التنسيق اختراع.. وعمل أزمة في التعليم

وزاد شوقي: «إحنا مش هنا عشان نتكلم عن خطة تطوير، في منصات تعليم وتبع الوزير، اللي عامل أزمة في التعليم مش الثانوية العامة بس، في اختراع تاني اسمه التنسيق، مفيش دولة في العالم بتعمل كده، قصة التنسيق خلت الوصول للجامعة حياة أو موت، ومن هنا الأهالي بيسعوا للدروس الخصوصية، وأولياء الأمور هم اللي بيبعتوا ولادهم للتعليم، وده العيب، العيب مش في القانون، والكلام دوقتي عن رسوم تحسين اختيارية».

وأضاف وزير التعليم: «عايزين تلغوا التحسين الغوه عشان يبقى مجلس الشيوخ هو اللي لغى فرصة التحسين، القصة مش في الرسوم، ولما الجامعات عملت رسوم عشان اللي يسقط يعيد السنة برسوم، مكانش في شبهة عدم دستورية، ودلوقتي الكلام عن رسوم تحسين أو 200 جنيه رسوم استمارة».

الوزير لـ«الشيوخ»: اللجنة لو كانت عاوزة القانون تناقشنا.. لازم المجلس يدعم تطوير التعليم

وهاجم الوزير، رفض النواب وعدم مناقشة القانون بشكل جيد، قائلا: «اللجنة لو كانت عايزة القانون تناقشنا، ولو كان المجلس عايز القانون يناقشنا، إيه المادة المرفوضة أو المطلوب تعديلها، بس اننا نعلن في الإعلام رفض القانون فده أمر مش كويس، كان لازم المجلس يدعم تطوير التعليم والنظام الجديد».

واعترض النواب بشدة على كلام وزير التعليم، وهنا تدخل رئيس المجلس، قائلا: «ليس هكذا تدار الأمور، ولا بهذه العبارات يعبر مجلس الشيوخ عن سياسة الدولة، ورفض القانون لا يعني عرقلة التعليم».

وأجاب الوزير، أنّ أولويات الوزارة لم تكن ما تحدث عنها النواب، لكن الحوار لم يدار بشكل صحيح، والتطوير في الثانوي أصبح أمر ملح، وتطوير التعليم الفني أيضا يسير بشكل سليم، ونظام الأسئلة والتقييم يتم إعداده منذ عامين.

• وزيرالتربية والتعليم الدكتور طارق شوقي
• طارق شوقي
• مجلس الشيوخ
• وزيرالتربية والتعليم الدكتور طارق شوقي
• طارق شوقي
• مجلس الشيوخ