«تحذير هام».. تبديل الفيزا بأخرى «مضروبة» للنصب على أصحاب المعاشات

09:59 ص | الأربعاء 07 أبريل 2021

«باستغلال براءة وطيبة كبار السن وبخاصة الأميين منهم»، تتعدد طرق الاحتيال والنصب حالياً، للحصول على المعاش الشهرى المستحق لهم، تجسد ذلك النموذج في الحاجة «ناريمان» التي وقعت فريسة لـ3 سيدات «نصبن عليها» وسرقن منها معاشها الشهري الذي تبلغ قيمة 4000 جنيه، مستغلين أميتها وعدم قدرتها على التعامل الإلكتروني مع «فيزا المعاش».

ناريمان عيسى إبراهيم 56 عاماً، من أبناء مركز شبراخيت في محافظة البحيرة، تعرض للنصب والخدعة، أول أمس، ما تسبب فى ضياع معاش زوجها الشهري: «3 ستات كانوا قاعدين جنبي فى البوسطة اللي بقبض منها وقالوا لي ورينا كده يا حاجة الفيزا بتاعتك زي بتاعتنا ولا لأ ووريتها لهم يشوفوها وفضلوا يعدوها على بعض كده هما التلاتة لحد ما ادوني واحدة تاني مش بتاعتي واكتشفت أنها لواحدة برضه اضحك عليها بنفس الطريقة ومعاشها اتسرق» بهذه الكلمات تروى «ناريمان» حيلة خداعها والاستيلاء منها على معاشها: «انا متعودة كل شهر بروح اقبض واقعد قدام البوسطة بحجز دور ولما ينادوا عليا بقوم اقبض وأنا مش بعرف لا اقرأ ولا اكتب وبيبقى معايا الفيزا وورقة في ضهرها مكتوب فيها الرقم السري عشان اقبض».

واقعة سرقة الحجة «ناريمان» لم تكن المرة الأولى، لمثل تلك حالات النصب: «بعد ما اتعرضت للسرقة اكتشفت أنها مش اول مرة ولاقيت ستات هناك كانوا قاعدين وقالوا لي انتي وقعتي في الفخ يا حاجة أنتي مش أول واحدة وعلى طول بيقعدوا هنا يخدعوا الناس الغلابة اللي ميقدروش يقروا ويكتبوا».

«مش عارفة هعيش ازاي ومعاشي بصرفه على الإيجار والدواء الشهري بتاعي»، واضطرت إلى «الدّين» هذا الشهر حتى تتمكن أن الانفاق على نفسها: «منهم لله ولا أقول حسبي الله ونعم الوكيل أنا واحدة ماليش حد غير ربنا ومعاشي كان بيكفيني أكل وشرب وعلاجي لأن أنا ست مريضة وكبيرة في السن ومقدرش اخرج اشتغل واجمع بدل الفلوس اللي اتسرقت مني».