ابنة صلاح رشوان: واحشني.. وغيابه كاسر ضهري
ابنة صلاح رشوان: واحشني.. وغيابه كاسر ضهري
قالت باكينام ابنة الفنان الكبير صلاح رشوان، إنه رغم مرور 4 أعوام على رحيل والدها في مثل هذا اليوم 20 فبراير عام 2017، إلا أنه «هيفضل واحشني وكاسر ضهري بغيابه».
وأضافت باكينام صلاح رشوان في حوارها لـ«الوطن»، قائلة: «فخورة إني بنت الإنسان العظيم صلاح رشوان، دائمًا يتقالي أبوكي محترم أوي، وده كرم من عند ربنا».
طقوس فنية
وفيما يخص طقوس صلاح رشوان خلال استعداده لأدواره الفنية، قالت ابنته باكينام «كان يدخل لغرفته ويغلقها تمامًا عليه ومعاه السيناريو ويقعد يذاكر ويقرأ الشخصية ويقف على تفاصيلها شكلها وصوتها على الشاشة، وكان يسرح ويقعد يفكر في الجمل الحوارية اللي هيقولها وكنت بسمعه وبشعر معه بمتعة، كل جملة يكون لها نبرة صوت معين وإحساس مختلف، كان بيركز جدًا عشان كل شخصية تكون مختلفة عن التانية».
بكاءه في المشاهد بسبب غياب أمه
وتابعت: «لمّا كنا بنتفرج على العمل الفني، دائمًا كان بيحس إنه عنده الأفضل عشان يقدمه، يسألني عن رؤيتي لدوره، وأنا كنت بقول ملاحظات ونتناقش إنه كان ممكن يقول تفصيلة هنا أو يغير في حركة، وكنت بسأله عن مشاعره وبكاءه ودموعه في بعض المشاهد، قال إن في المشاهد دي كان بيفتكر أمه الله يرحمها عشان يبكي بجد ويتأثر بسبب فراقها».
الفن مصدر رزقه الوحيد
وعن نصائحه لها، قالت باكينام صلاح رشوان، كان دائمًا يقول «سلاحك في الحياة شغلك بالرغم من إن أبويا لم يوافق على عمل أمي، لكن معايا أنا وأختي شاهندة كان مؤمن بضرورة إن البنت لازم تشتغل ويكون لها كيانها وفلوسها، الزمن والصعوبات التي واجهها في حياته جعلته يغير تفكيره لأنه شاف إن الدنيا ملهاش أمان، خصوصًا وأن مصدر رزقه كان الفن فقط، كان بيقول مش بعرف أعمل حاجة غير التمثيل ولا يحب أن يجازف بمشروعات لا يعرف عنها شيئًا».
قسوة الفراق
وتابعت: «كان دائمًا يقول لي لمّا هتتجوزي، هتعيشي معايا في البيت لأنه مرتبط بينا جدًا، ووقت خطوبتي بعد وفاته كنت بشعر بفقدان غالي وعزيز على قلبي، احساس قاسي بأن بابا اللي هو كل حاجة في الدنيا مش موجود في لحظة، ولسه بحتاجه طول الوقت، عشان كده يوم خطوبتي وقفت بجوار صورته عشان أبويا حاجة كبيرة عندي».
واستطردت «كان دائمًا يقولي لا تنتظري رجل يصرف عليكي حتى لو كان جوزك ملزم بيكي، لابد أن يكون لك شغلك وكيانك وحياتك الاجتماعية، واكتشفت إنه كلامه صح فعلًا لأن الوظيفة مش بس فلوس، ولكن كيان مستقل حتى لو العريس مقتدر ماديًا لازم تحس بذاتها ولها دور في المجتمع».
أب مثالي وزوج مخلص
وعن علاقته بزوجته، قالت باكينام صلاح رشوان، العلاقة بين أبي وأمي، كانت قائمة على حب كبير وعلى الاحترام ولم يرفع صوته يومًا أو ينفعل أو يغضبها بشكل جارح «بتعتبره صديقها وأبوها وكانت معاه في فترة مرضه ورحلة علاجه، وطول الوقت مركزة في شغله ومساعدته كأنها مديرة أعماله بتحضر معاه المشاهد والملابس وكل تفاصيل شغله».
وأضافت «العلاقة بينهم كانت قصة حب، شافها وأُعجب بها وعزمها على حاجة، وطلب يتجوزها، وكانت خايفة أخوها الكبير يرفضه لأنه ممثل، فجأة راح البيت وقعد معاه لأن والدها متوفي، وقعدوا مع بعض 5 ساعات والعلاقة اتوطدت بينهما ووافق على زواج أخته بأبويا لأن شافه إنسان مثقف».
