قبل قدم أمه وحضن عروسته.. حازم يثير إعجاب السوشيال ميديا: «مبحبش الشو»
قبل قدم أمه وحضن عروسته.. حازم يثير إعجاب السوشيال ميديا: «مبحبش الشو»
فقد والده منذ صغره، وعاشت والدته من أجله تحرص على رعايته وتعليمه وإعطائه كل الحب، محاولة تعويضه عن غياب الأب، الأمر الذي جعله خلال حفل زفافه بدون تخطيط مسبق لذلك، أن يأخذ الميكروفون من المأذون بعد عقد القران ويوجه كلمات لها ثم تقبيل قدمها أمام جميع المعازيم وسط أجواء من الدموع من التأثير والتصفيق الحار.
«فليشهد الله أن الست دي تعبت عشاني كتير جدا جدا ومهما أعمل ومهما أقول مش هو فيها جزء من اللي عملته معايا عشان كده أنا قدامكم جميعا هعمل الحركة دي».. هذه الكلمات التي رددها حازم عصام في حفل زفافه لوالدته ثم قبل قدميها واحتضنها وذهب إلى زوجته «العروسة» مسرعا لاحتضانها بعدها: «مكونتش مخطط خالص الموضوع جه كده أنا وحيد والدتي ووالدي متوفى من وأنا صغير حسيت أن ليها حق عليا ولازم أبينه قدام الناس»، بحسب وصف العريس لـ «الوطن».
لم يكن يتخيل حازم أنه يمكن فعل هذا التصرف أمام الجميع في حفل زفافه، حيث إنه لم يخطط لذلك من قبل والفكرة جاءت له بشكل مفاجئ بعد عقد القران: « ده مجرد إحساس ولو كانت مترتبة مكنتش هتيجي كده، اكيد أي راجل بيحب أمه وأمه بتحبه وأنا مكونتش متخيل اني ممكن اعمل ده قدام الناس بس حسيت أن أقل واجب خاصة أنها هترجع البيت لوحدها وابنها اللي مربياه من صغره ووالده مش موجود مش هيبقى معاها وأن أنا هبدأ افرح ويبقى ليا بيت مستقل قولت دي كلمة شكر اقولها ليها قدام الناس»، وفقا لقوله.
وعن رد فعل المعازيم، حكى حازم أن كانوا يصفقون ويرددون «كتر خيرك» مؤكدا أنه لم يكن يسعى لكسب إعجاب الناس: «أنا مش بعمل شو كل اللي بعمله كلمة شكر أما بالنسبة لموقف مراتي إني روحت حضنتها على طول فده فرحي ومراتي دي حب عمري، فطبعا كان أمي وبعدها عروستي أنا مليش غيرهم، ومراتي مش غيرانة بالعكس متفهمة جدا علاقتي بوالدتي».
المأذون محمد رفعت الذي عقد قران حازم، ونشر مقطع الفيديو الذي انتشر على مواقع التواصل الاجتماعي عبر حسابه الشخصي، حكى لـ «الوطن» رد فعله من تصرف العريس: «كان غير متوقع تماما والموقف ده أول مرة يقابلني في فرح أو كتب كتاب، والناس كلها انبسطت أوي وكانوا متأثرين ومتعاطفين معاه».
وتأثر المأذون بشكل كبير من تصرف العريس بكلماته وتقبيل قدم والدته موضحا: «كان باين أوي حبه لأمه وعمل كده بإحساس مش شو نهائي، وهو والده متوفى وهي اللي شايلاه من زمان، أنا فرحت جدا واتأثرت أوي وقعدت لحظات بستوعب الموقف، وقررت أنشر الموقف الإيجابي ده على حسابي عشان الناس تشوف تقدير الأم».
