الحيوانات أيضا تحتفل بالكريسماس: انت وأليفك طقم واحد بـ390 جنيه «صور»

03:22 م | الثلاثاء 29 ديسمبر 2020

«دلوقتي تقدر تلبس أنت وأليفك زي بعض، سواء كلب أو قطة، وتتصوروا صور عائلية لأنهم أكيد فرد من العيلة».. عرض صفحة لبيع ملابس الحيوانات الأليفة على موقع التواصل الاجتماعي احتفالا بالكريسماس، والسعر 390 جنيه، يشمل تيشيرت الشخص وتيشيرت الحيوان.

إسراء السكري صاحبة الفكرة وصفحة لبيع ملابس الحيوانات الأليفة، التي أنشأتها منذ نحو شهر ونصف، نظرا لظروف وقف السياحة في البلاد، بسبب فيروس كورونا المستجد، حيث إنها تعمل في الأساس مرشدة سياحية قررت فتح مشروع غير متوافر في مصر: «أنا ربيت كلاب وكنت بستنى كل سفرية أطلع فيها بره مصر، عشان اشتري لبس لي ومكنتش فعليا بلاقي حاجة في مصر، عشان كده جاتلي الفكرة دي»، بحسب وصفها لـ«الوطن».

وصفحة «colavy» لإسراء مقتصرة فقط على ملابس الحيوانات الأليفة سواء للكلاب أو القطط، حيث إنها لا تبيع الأطعمة الخاصة بهم أو أي أكسسوارت أخرى: «عشان الحاجات دي أكتر حاجة واخدة حقها في السوق المصري لكن الهدوم لأ، فبدأت استورد الحاجات دي وفي جزء أصنعه في مصر وجبيت أخوض تجربة التصنيع بنفسي، خاصة لما شغلي وقف ففكرت أطلع برة الصندوق»، وفقا لقولها.

رد فعل الناس على مشروعها كان جيد جدا بالنسبة لها، حيث إنها وفرت لأصحاب الحيوانات الأليفة أشكال وألوان كثيرة مختلفة بدون الحاجة إلى البحث أونلاين، على مواقع تسوق خارج مصر أو انتظار السفر للحصول على ملابس لحيواناتهم: «البيج ليهم كانت اختراع والإقبال كان مرضي لأني لسة فاتحة جديد والعميل مبيبقاش عنده ثقة أوي في الأوردرات الأونلاين».

وعن هدف بيع الملابس للحيوانات الأليفة أو ارتداءها الكلاب أو القطط شرحت المرشدة السياحية أن الملابس تناسب فصل الشتاء: «الناس لازم تمشي كلابها في أي جو مرتين في اليوم على الأقل عشان الحمام فبيحتاج يدفى مش زي القطط طبعا بس برده بيبقى محتاجينها في البرد»، كما أن متوفر أحذية لهم للحفاظ عليهم من السير في الشارع، أما بالنسبة لفصل الصيف فيوجد أيضا أزياء تناسبهم للأشخاص الذين يفضلون جعلهم بشكل أنيق.

«موضوع البس زي أليفك ده جه من أنا بربي كلاب بقالي فترة طويلة وقولت نفسي ألبس زيهم زي ما الناس بتعمل مع أولادها، هما بالنسبة ليا أولادي أنا معنديش أولاد فالكلاب عيالي».. وصف إسراء عن حبها الشديد في الحيوانات الأليفة حيث إنها صنعت بعض الملابس في مصر بخامات وجودة عالية: «بخلي العميل مش قادر يعرف الفرق بين المحلي والمستورد وهما بيلبسوا زي بعض نفس الرسمة باختلاف الكلام».

وعن أسعار إسراء، شرحت أن «طقم التيشرتين زي بعض للشخص وأليفه بـ 390 جنيه بمختلف المقاسات وفي حال كان زي للكلب فقط فتبدأ الأسعار من 50 لـ 450 حنيه حسب حجمهم، والمنتجات تناسب القطط أيضا ويصل سعرهم لـ 350 جنيه أما الأحذية تصل لـ 300».