في اليوم العالمي للاجئين .. "تعالوا إلى ميدان الاتحاد وشاركونا فرحتنا"

"مسرح، عروض فنية، أنشطة يدوية".. أفكار بسيطة قرر من خلالها فريق "خمسة نتفاهم" أن يحتفل بها باليوم العالمي للاجئين هذا العام، حيث قرروا أن يرسموا الابتسامة على وجوه الأطفال اللاجئين بمنطقتهم بحدائق المعادي. حسام محمد، أحد أعضاء الفريق، قال إن هدف الاحتفال بالأطفال اللاجئين، إشعارهم أنهم ليسوا مغتربين، لافتًا إلى أن فريقه لأول مرة يشارك في هذا الاحتفال باليوم العالمي للاجئين. "فكرنا إننا نفرح جيراننا اللاجئين اللي ساكنين في المنطقة، ونهتم بالأطفال أكتر عشان فيه سوريين كتير عندنا مش لاقين مكان يحميهم وغلابة"، يضيف حسام: "هنقف في ميدان الاتحاد ونجمعهم عشان نطلع المواهب اللي جواهم، واللي هيشاركنا مش شرط يبقى من الفريق والدعوة عامة، اللي عندوا لاجئ جنب بيته يجيبه ونحتفل كلنا".[SecondImage] يحاول الشاب العشريني وفريقه تقديم ما هو جديد في الشارع بين فئات المجتمع: "إحنا لا ننتمى لأى تيارات أو أحزاب سياسية، إحنا شباب بيحب مصر"، ويتابع: "دائما ننزل الشارع نحاول نوصل المفهوم الصح للناس في أي حاجة غلط بيعملوها، ونعلمهم أسلوب المناقشة والتفاهم وعشان كده كنت من الناس اللي مهتمة تشترك مع الفريق لعمل أي شئ إيجابي في المجتمع". يسعى "حسام" لجمع عدد كبير من اللاجئين المقيمين بمنطقته وخارجها، "حاولت أنشر الفكرة وسط الناس عشان متبقاش مقتصرة على المعادي بس، عايزين أي منطقة فيها لاجئين نجمعهم في الميدان ونحتفل بيهم ونفرحهم، عشان دورنا إننا نحتفل بيوم زي ده معاهم، ونحسسهم إننا جنبهم وإن مصر أم الدنيا ووقفة جنبهم وقت المحنة ومرحبة بيهم".