مطعم يبيع سندوتش الكبدة بـ5 جنيهات: مستوردة مش لحم كلاب
مطعم يبيع سندوتش الكبدة بـ5 جنيهات: مستوردة مش لحم كلاب
"يوجد رغيف.. كبدة وسجق.. بـ5 جنيهات"، تلك الكلمات التي كُتبت على لافتة أحد المطاعم بمنطقة الدقي ووسط البلد، لجذب الزبائن إليها بعرض لا يمكن رفضه لعشاق الطعام، الأمر الذي أثار تساؤلات البعض حول جودة اللحوم المقدمة نظرًا لقلة ثمنها.
خوف بعض المواطنين من عدوى كورونا، دفعهم لعدم الشراء من الخارج، الأمر الذي دفع المطعم لتقديم العروض التي لا ترفض، بحسب ما رواه سيد محمود، صاحب أحد الفروع، خلال حديثه لـ"الوطن": "أخويا الكبير عفيفي اقترح الفكرة دي بعد فيروس كورونا، علشان يمشي الشغل شوية بعد الكورونا، وشغلنا الأساسي بيكون كبده وسجق، لكن بنقدم حاجات تاني زي الحواوشي".
الرغيف حجمه كبير مش صغير وبيتراوح ما بين 20 لـ25 سم، وفقا لـ"سيد": "كنا بنبيع الرغيف بـ7 جنيه قبل الكورونا، بس كان لازم يكون فيه عرض يشد الناس، والحمد لله العرض نجح والناس بقت تيجي كتير زي الأول".
سيد: لحمتنا مستوردة والزبائن مشهورين
وعن مخاوف البعض من جودة اللحوم، رد "سيد" قائلا: "طبعا مش هنأكل الناس لحوم فاسدة أو كلاب ولا حمير، لأن لحمتنا كلها بنجيبها من مستوردين، أكيد مش بنشتغل بلحوم بلدي، بس لحومنا المستوردة مضمونة من ناس معروفين".
واستطرد "سيد" حديثه: "بقالنا 40 سنة في المجال، والناس كلها عارفانا، ولينا زباين كتير مشهورين منهم الفنان أحمد عدوية اللي أكل عندنا قبل كده، فطبيعي شغلنا معروف وإلا الناس مكنتش هتيجي".
وبداية المطعم، كانت عن طريق والدهم، بحسب "سيد": "والدي اللي افتتح المطعم، واحنا لما كبرنا اتعلمنا الشغلانة ومشينا على خطاه، علشان كدا مستوردينا كبار وعارفينهم من زمان ولحمتهم مضمونة".
