حطيله زمزمية ملوخية.. أم تثير الجدل بـ"ساندوتش بط" في "لانش بوكس" ابنها

05:29 م | الأحد 08 نوفمبر 2020

تحت عنوان "سندويتشات بط سلايز"، أثار منشور على موقع التواصل الاجتماعي "فيس بوك" ضجة كبيرة من المستخدمين، بسبب تحضير أم "ساندويتش بط" لابنها خلال ذهابه إلى المدرسة وهو الأمر غير المعتاد، فليس من الطبيعي أن يحضر الطالب معه بط بدلا من "الجبن واللانشون".

وجاء المنشور نصا: "إحنا دخلنا المدارس من 20 يوم، تقريبا عملت كل أنواع الساندوتشات ودماغي وقفت ومبقتش عارفة أعمل إيه تاني، لقيت نفسي بعمل ساندونشات بط سلايز، آه والله بط، هو اللي لاقيته في وشي".

واستكملت السيدة حديثها قائلة: "أعمل إيه يعني، والجميل في الموضوع إن ابني راجع مزقطط ومبسوط، تفتكروا عشان الساندوتشات".

ولقي المنشور ضجة كبيرة وسخرية من مستخدمي موقع "فيسبوك" سواء بمشاركته مع قائمة الأصدقاء أو بعمل "كوميكسات" ومن أبرز التعليقات "أنا أمي ربنا يديها الصحة كانت مفيش خيارين يا الطعمية يا الجبنة القديمة اللي كانت بتبقي ناشفة في التلاجة و يوم ما تعمل معانا واجب كانت تجيبلنا عيش فينو"، و"الله يرحمك يا أمي لما كانت بتدلعني كانت تعملي سندوتش عنب اه وربنا وأنا كنت بموت من الفرح على أساس إنه تغيير"، و"بط بتعملي لابنك سندوتشات بط وأنا اللي بجيب فرخة أمهات كل دخلة رمضان وأضحك على ولادي وأقولهم ده رومي".

وتوالت التعليقات بــ: "سامحونى ياعيالى على طن الجبنة اللى أكلتوه"، و"مستغربين ليه كان ليا زمايل كانوا بيجيبوا معاهم المدرسة سندوتشات سمك ومرة كان واحدة جايبة سندوتش بامية"، و"مستغربين إنها عملت سندوتشات بط أنا أعرف إن فيه واحد كان بياخد شوربة في كيس" و"يا حبايبى يا عيالى لو كبرو وشافوا بوست زي ده ورموني فى دار مسنين هيبقى أقل واجب"، و"الواد راجع نافش ريشه"، و"أمه وارثة اكيد"، و"كان أقصى طموحي أمي تعملي ساندويتش لانشون".