للهروب من أسعار ملابس الشتاء الباهظة.. سيدات يلجأن لشراء موضة 2019
للهروب من أسعار ملابس الشتاء الباهظة.. سيدات يلجأن لشراء موضة 2019
للهروب من الأسعار المرتفعة لملابس الشتاء، لجأت بعض المحلات وجروبات السيدات على موقع فيسبوك، إلى حيلة بيع ملابس العام الماضي، بأسعار مخفضة تتراوح بين 150 و200 جنيه، بهدف زيادة الربح وتنشيط حركة البيع، بعد ركودها مؤخراً.
"في ملابس شتوية معروفة والموضة بتاعتها مش بتقدم وده اللي بيتباع دلوقتي قبل ما الشتاء يهل"، بحسب ندى علي، صاحبة جروب للملابس، فبمجرد إعلان اتهاء فصل الصيف، عرضت "ندى"، قطع مختلفة ومميزة من ملابس شتاء 2019: "في سيدات بتستنى الوقت ده وتشتري فيه خصوصاً البنات اللي قربت تجوز بتبقى عايزة تشتري بتكلفة قليلة، ودول غالبية زبايني في الفترة دي".
تحرص ندى على بيع الماركات المحلية والعالمية، ولكن بأسعار بسيط: "الملابس دي بشتريها في الكازيون بتاع كل موسم وابيعها انا بتكلفة قليلة ودي اللي بتناسب اللي قاعدين على الفيسبوك".
وبحسب "ندى" فالإقبال على شراء ملابس العام الماضي على الإنترنت، كبير جداً: "الست الناصحة هي اللي تشتري دلوقتي عشان كمان شهر الهدوم سعرها هيبقى نار واللي بـ 100 هيبقى بـ 300 جنيه معروف موسم الشتاء أسعاره في العالي". توفر ندى أشكالا مختلفة من ملابس السيدات والأطفال، تناسب كل الأعمار.
داخل أحد محلات الملابس، بمنطقة مصر الجديدة، تخصص سالي أحمد، جزءا خاصا ببيع ملابس الشتاء للعام الماضي، بأسعار بسيط: "البلوفر بـ 100 جنيه، والكارديجان بـ 200 جنيه، والأسكارف بـ 70 جنيه وكل الأسعار دي هتزيد تاني حتى لو موضة قديمة بس في الوقت ده بنشجع البنات على الشراء تقدر تجيب اللي يناسبها وبسعر رخيص جداً"، ووفقاً لـ"سالي"، وبالفعل وجدت تفاعلا وإقبالا كبيرين بين السيدات، وهو ما دفعها على استمرار البيع بهذه الأسعار المخفضة: "من مصلحتي أن أبيع بالأسعار الرخيصة خصوصاً الشتاء لسه مبدأش عشان أزود المبيعات في المحل، وأغلى قطعة عندي بـ200 جنيه ودا الكارديجان وبيبقى صوف فتكلفته في عز موسم الشتاء بـ500 جنيه".
