أسامة منير: مكالمات الخيانة كتير اليومين دول.. وبخاف أخرب البيوت

11:16 م | الاثنين 31 أغسطس 2020

قال الإذاعي أسامة منير، إنه لم يشعر بالملل خلال فترة الإجازة بسبب كورونا، "كنت حاسس إني مسافر برة مصر ونفسي أرجع للشغل، البرنامج هو الويك إيند بتاعي"، متابعا: "أنا عمري ما كنت حلال عقد، ولا بحل لأصحاب المشاكل مشاكلهم".

وتابع "منير" خلال لقاء ببرنامج "مساء dmc"، المذاع على شاشة قناة "dmc"، وتقدمه الإعلامية إيمان الحصري، "اللي حصل إني كنت بتكلم عن الحب في المطلق، افتكرت الناس هتقولي كلام عن الحب، وفوجئت بأول مكالمة بتقولي عندي مشكلة ممكن أحكيهالك؟ قولتلها اتفضلي، بدأت أسمع وأجاوب، بعدين لقيت المكالمة اللي بعدها كده واللي بعدها، فالبرنامج أتحول كدة من أول حلقة".

وأضاف أنه بعد ذلك شعر بالخوف "خايف أخرب بيت حد"، فأصبحت حريص على السماع والفهم، ومحاولة قراءة ما بين السطور، ومع الزمن الوضع اختلف، واستطيع معرفة الموضوع من بدايته، "مفيش بردو قصة زي التانية لازم فيه تفاصيل مختلفة، وده سبب نجاح البرنامج".

وواصل: "مكالمات الخيانة كتير اليومين دول، بقى سيزون، زمان كانت مشاكل الحب من طرف واحد، إضافة لقصص الخيانة، وبعد الثورة حصلت طفرة كبيرة في المشاكل بسبب الظروف الاقتصادية والمادية، بعد كدة بدأت المشاكل تدخل في الخطوط الحمراء، وفيه ناس بتقولي أنا عاوز أنسى الماضي فإزاي أرجعله أو أنساه وده عملي صدمة".