فندق في الزمالك يقدم عرضا لسكان "الشربتلي".. الليلة بـ790 جنيها
فندق في الزمالك يقدم عرضا لسكان "الشربتلي".. الليلة بـ790 جنيها
"يقدم الفندق عرض 790 جنيها لليلة، شامل الضرائب وإفطار مجاني، كمساهمة في التخفيف عن سكان عمارة الشربتلي بالزمالك، المتضررين من تصدع العقار".. عرض خاص قدمه فندق في الزمالك، لسكان العمارة الذين غادروا شققهم قبل أيام من حلول عيد الأضحى، والعرض كما حددت إدارة الفندق مستمر حتى 31 أغسطس المقبل.
"الليلة عندنا شاملة الضريبة في الغرفة السينجل بـ1000 جنيه والدبل بـ1200 جنيه مع الإفطار، بس إحنا حاولنا نقلل الأسعار عشان نقدر نساعد المتضررين بدل ما يروحوا يأجروا شقة في الزمالك بسعر غالي جدا، واختيار الغرفة يرجع للساكن نفسه"، بحسب محمد سعيد، مسؤول الحجوزات بالفندق.
سعيد أكد أنّ العرض بدأ منذ 27 يوليو الحالي ومستمر حتى نهاية أغسطس المقبل: "الوقت ده كافي يكون السكان قدروا يتصرفوا ويشوفوا شقة تانية سواء في الزمالك أو بره، لان الزمالك معروف أسعارها غالية، وإحنا الفندق الوحيد اللي قدم خصومات كده لسكان العمارة، في فنادق حوالينا قدمت خصومات لكن مش بالشكل ده".
لم يكتف الفندق بهذا العرض، بل أضاف عليه تخفيضا على وجبتي الغداء والعشاء، على أن تكون وجبة الإفطار مجانا: "على حسب سعر الوجبة بنحرص أننا نقلل في سعرها حتى لو 20% وطبعا لو حابين يجيبوا أكل من أي مطعم بره ده مسموح به في أي وقت".
ووفقا لما أكده "محمد"، يخضع الفندق لنظام تعقيم وتطهير باستمرار، لاتباع الإجراءات الوقائية والسلامة الصحية للنزلاء كافة: "محدش من السكان لحد دلوقتي حجز عندنا، بس في ناس منهم بتتصل تستفسر عن نظام الاستضافة ومستنين تأكيد الحجز".
