شوقي: شطار في استخدام التكنولوجيا في الغش.. ليه منستخدمهاش في التعليم؟

11:43 م | الأربعاء 06 مايو 2020

علق الدكتور طارق شوقى، وزير التربية والتعليم والتعليم الفنى، على فيديو متداول لإحدى أولياء الأمور تدعي أنها حاصلة على الدكتوراة وتشجع الطلاب على الغش.

وقال شوقي، خلال مداخلة هاتفية مع الإعلامي وائل الإبراشي، في برنامج "التاسعة"، المذاع عبر القناة الأولى بالتلفزيون المصري: "ده نموذج من مئات، واللي لفت نظري إني سمعت صوت ولية أمر طالب وبتقول إن معاها دكتوراة وبتشجع الولاد على الغش، كما لو كان هي معتقدة في اللي بتقوله، وبتقول لهم انتم اتحرمتم من الغش في اللجنة، كما لو كان الغش في اللجنة من الأشياء المباحة وأنهم اتسلب منهم هذا الحق".

وأوضح شوقي أن السيدة قالت: "قاعدين في البيت يا حرام وبالتالي متخافوش والوزير مش هيعرف يمسككم ولا هيدور عليكم، وغشوا براحتكم ده أقل حاجة، وإن شاء الله تكبروا وتبقوا دكاترة زيي".

وأوضح شوقي أن هذه الرسالة منتشرة على مواقع الغش الموجود فيها عشرات الآلاف: "لما الكبار يقولوا كده تربويًا متوقع إيه من الطالب؟ وفيه أمثلة كثيرة مش عايز أذكرها لكن جنبها فيه ملايين استفادوا جدا وعملوا أشياء رائعة جدا واتعلموا".

وتابع: "المشكلة بتاعتنا إن اللي عايز يتعلم في هذا الجو هو اللي تعبان، لأنه قاعد في وسط ناس بتحاول تعمل حاجة تانية وبيضغطوا عليه كمان"، مضيفًا: "بنحاول نميز اللي عنده موهبة وعنده الرغبة والدولة تديله كل شيء مجاني، وتديله أحسن خدمة ممكنة، وده اللي بنحاول نعمله".

واستطرد: "بس مش من المسئولية إن الفلوس اللي الدولة بتطلعها بصعوبة شديدة لكل القطاعات تهدر بهذه الأساليب"، متسائلًا: "إذا كنا شطار جدا في استخدام التكنولوجيا في الغش، ليه منستخدمهاش في التعليم؟" معتبرًا أن هذه مسألة وعي وثقافة.