صول "الاختيار" يروي الكواليس: أمير كرارة بيتعامل معانا زي منسي مع الجنود

03:59 م | الثلاثاء 05 مايو 2020

المشاركة في مسلسل "الاختيار" الذي يجسد حياة الشهيد البطل العقيد أركان حرب أحمد صابر منسي، قائد كتيبة 103 صاعقة، ربما كان حلما للكثيرين حتى ولو من خلال مشهد صغير، وهو ما تحقق مع الممثل أحمد سند.

ظهر "سند" في دور صول الكتيبة 103 صاعقة، والذي لا يخرج في المداهمات أو تنفيذ عمليات قتالية، ولكن يظل في مكان الكتيبة، حيث إنه يقوم بتدريب العساكر والتواصل مع القائد بشكل دائم: "إحنا بنتعذب في التصوير لإن احنا بنصور في كتيبة حقيقية، وبنسيب حاجتنا بره، وبنعيش جوه حياة عسكرية كأنك في الجيش، الناس دي فعلا بتتعب جدا وعلى راسنا"، وفقا لقوله لـ"الوطن".

وحكى أحمد سند، عن كواليس مسلسل "الاختيار"، كاشفا عن أن كل جنود الكتيبة هم جنود بالفعل وليسوا مجموعة من الكومبارس أو الممثلين: "مفيش من بره غير 5 أو 6 ممثلين، أنا منهم، والعساكر الباقيين كلهم مجندين"، ورغم أن دور الصول ليس كبيرا إلا أنه يتواجد طوال مدة التصوير لأنه جزء من الكتيبة ومن الممكن أن يحتاجونه في أي وقت: "مينفعش واحد موجود والتاني مش موجود".

"بنوصل مكان التصوير من 6 الصبح لحد 11 بليل، بس مش متضايقين".. وصف "سند" الذي نقل صورة كواليس العمل في المسلسل والتي بالنسبة له الأقرب إلى قلبه: "محبتش كواليس زي الاختيار، سواء بنصور أو لأ، مبسوطين وحاسيين اننا بنعمل حاجة حلوة ومختلفة عن أي حاجة، في أي كواليس تانية ممكن أحس بملل، لكن ده لأ".

وحاول أحمد سند، الوصول إلى الصول الحقيقي ولكن الأمر كان صعبا، إلا أنه تفاجأ بصدفة غريبة حيث يخبره زملاء الصول الحقيقي، أنه يشبهه كثيرا: "بيقولولي انت نسخة من الصول فعلا، وشكله مليون في المية" بحسب قوله.

حالة من الفخر والسعادة يشعر بها "سند" لمشاركته في المسلسل، حيث جرى ترشيحه من قبل مساعد المخرج إبراهيم فرج، واختياره من المخرج بيتر ميمي، وخاصة عندما يستمع إلى حكايات عن "منسي" من قبل زملائه حيث لم يختلف عليه شخص: "أي ممثل كبير كان يتمنى يظهر ولو بجملة واحدة بس اسمه يكون موجود".

"اللي بيعملوا أمير كرارة في الكواليس، هو اللي منسي كان بيعملوا مع العساكر".. هكذا عبر أحمد سند، عن طريقة تعامل أمير كرارة، الذي يؤدي دور "منسي" في المسلسل، حيث إنه يحرص على التعامل مع الجميع بشكل لائق وبتقدير وحب واهتمام: "كان في ممثل كل ما ييجي يقول جملتين يغلط، أمير أخده تحت كتفه وقاله بص متقلقش خالص إحنا مش مستعجلين خالص ومش ورانا حاجة، على مهلك وقول براحة، وفضل معاه واحدة واحدة".

وتابع: "اللي عمله ده ميعملوش أي حد، لكن هو أخد الموضوع بقلب جميل، ويقعد يهزر مع الناس وكلنا واحد"، أما المخرج بيتر ميمي، فيتعامل بروح الفريق الواحد وينشر البهجة بين الناس: "إنسان جميل جدا، وسبق واتعاملت معاه في كلبش، والأب الروحي، الواحد بيحب يشتغل معاه".