بريد الوطن.. يا عزيزى كلنا أبطال
بريد الوطن.. يا عزيزى كلنا أبطال
البطولة فى فيلم الكورونا اللى عايشين أحداثه دلوقتى ما ينفعش تكون من نصيب الأطباء فقط، مع كامل التقدير لمجهوداتهم، البطولة فى الفيلم ده جماعية، ومتقسمة على كل واحد بيساعدنا فى الفترة دى، من أول الفران اللى بيستحمل صهد الفرن علشان يعمل لنا رغيف العيش، مروراً بالفلاح اللى ضهره بينقسم فى الأرض، علشان يزرع ويقلع الفاكهة والخضار اللى بيوصلوا لنا عن طريق الفكهانى وبتاع الخضار، السباكين وعمال تنظيف الشوارع، رجال الشرطة اللى بيسهروا فى الجو الغريب ده يأمنونا فترة الحظر وإحنا قاعدين مريحين فى بيوتنا، العمال باليومية اللى اتوقف حالهم متحملين، والناس اللى اضطرت تسيب شغلها، والناس اللى مضطرة تنزل شغلها لأنها ما تملكش رفاهية القعدة فى البيت، المدرسين اللى بيتواصلوا مع الطلبة فى بيوتهم علشان يشرحوا لهم أون لاين، الستات اللى مجهودهم زاد الضعف بعد قعدة الرجالة من الشغل، والولاد من المدارس فى البيت من تنضيف كل ساعة أكل أكتر من مرة فى اليوم، وشرح للولاد، رجال الدين اللى بيطمنونا بجرعات روحانية تقوينا على مواجهة وتقبل مصائب الوباء بصبر واحتساب، الإعلاميين اللى بيطلعوا هوا علشان ينقلوا لنا الأحداث أولاً بأول، ومن الجنود المجهولين مذيعى الراديو اللى بيطلعوا أغلب اليوم علشان يسلونا وإحنا فى البيوت، إحنا كمان بالتزامنا بالتعليمات من أول المية والصابون، لحد عدم النزول إلا فى الضرورة أبطال.
مصطفى سيد عبدالسلام
الدلاتون - منوفية
يتشرف باب "نبض الشارع" باستقبال مشاركاتكم المتميزة للنشر، دون أي محاذير رقابية أو سياسية، آملين أن يجد فيه كل صاحب رأي أو موهبة متنفساً له تحمل صوته للملايين.. "الوطن" تتلقى مقالاتكم ومشاركاتكم على عنوان البريد التالي bareed.elwatan@elwatannews.com
