"ميني باص" و"توك توك" في خدمة الجيش الأبيض: توصيلة ببلاش

06:20 م | الأربعاء 15 أبريل 2020

على الرغم من ظروفهما الصعبة، لم يمتنعا عن تقديم الخير والمساعدة فى ظل أزمة «فيروس كورونا»، وقررا توصيل جميع الأطباء والممرضين مجاناً، رافعين شعار «هنشيلكم على راسنا».

وائل فوزى، 39 سنة، من العمرانية، سائق ميكروباص خاص للسياحة والرحلات، بعد رؤيته معاناة الممرضين والأطباء، قرر توصيلهم إلى أى مكان بدون مقابل: «دى أبسط حاجة أقدر أقدمها لهم، ربنا يكون فى عونهم، مستعد أوصلهم لأى مكان وممكن أستناهم أو أرجع أجيبهم تانى، ده أنا لو أقدر أتطوع معاهم مش هتأخر».

ظروف العمل الصعبة فى هذه الفترة، وهو فى أمس الحاجة إلى أى عمل، لكنه لم يتأخر عن أى عمل خير: «عندى التزامات كتير، الفيروس جه ووقف الشغل خالص، بس لو ساعدنا بعض ووقفنا مع بعض الأزمة هتعدى على خير». لم يكتف «وائل» بتوصيل الجيش الأبيض فقط، فقد تطوع لنقل أى حالات أصابها التعب إلى المستشفيات ليلاً: «فيه حالات كتير بتتعب بالليل، باوديهم المستشفى وباركّبهم على الكنبة اللى ورا، وباعقم العربية وراهم».

الخدمة نفسها وهبها عمرو قطب، سائق توك توك، من مدينة الباجور بمحافظة المنوفية، لأفراد الطاقم الطبى، ففى الوقت الذى رفض فيه بعض السائقين توصيلهم خوفاً من إصابتهم بكورونا، قرر هو توصيلهم مجاناً وكتب لافتة بذلك على التوك توك الخاص به: «من يومين ركب معايا ممرض وبسأله عن أخبارهم، قال لى إنه بينزل كتير ومحدش بيرضى يركبه عشان عارفين إنه شغال فى الحجر الصحى بمستشفى الباجور، فقلت إنى هوهب نفسى فى خدمتهم وأى توصيلة أنا مستعد ليها».

يحكى «عمرو»، 31 عاماً: «ما رضتش آخد من الممرض فلوس، وطلبت منه يكتب لى يافطة تقول إن الركوب مجاناً لأى دكتور أو ممرض، لأنى ما بعرفش أكتب ولا أقرا».