فيديو.. عمرو سعد: اللي يرفض دفن جثمان إنسان يبقى قليل الشهامة والدين

استنكر الفنان عمرو سعد، المشاهد التي انتشرت حول رفض الأهالي في إحدى القرى دفن جثمان طبيبة بمقابر القرية، توفاها الله مصابة بفيروس كورونا، وتجمهرهم لمنع ذلك.

وقال عمرو سعد، في فيديو نشره عبر حسابه الرسمي على "فيسبوك": "أهلا بيكم وكل سنة وأنتو طيبين.. باختصار أنا مش من الناس اللي بتحب تنزل فيدوهات على السوشيال ميديا.. مش بحب أعلق على حاجات كتيرة في المجتمع لكن دي مش شغلتي أنا ممثل بعمل أعمال فنية وبحط الأفكار اللي بصدقها في الشغل بتاعي".

وتابع: "ولكن المرة دي كنت متحفز جدا أتكلم في الموضوع ده كشخص عادي بسيط متربي في أسرة بسيطة ونشأ على مفاهيم بشوفها دلوقتي مهددة في موقف معين، وهو موقف عدم قبول بعض الأهالي دفن جثامين الشهداء.. اللي بعتبرهم شهداء من أطباء ومرضى فيروس كورونا.. إزاي أهالي قرية كانوا رافضين دفن جثمان الطبيبة المتوفية مصابة بالكورونا؟".

وأكمل: "اللي يرفض دفن جثمان إنسان يبقى قليل الإنسانية وقليل الشهامة والمصرية والمبادئ وقليل الجدعنة والدين.. كل المبادئ اللي اتعلمناها وشربناها من أجدادنا إكرام الميت دفنه.. فين المصريين اللي بيحترموا قدسية الموت وحرمة الميت.. النهاردة بيحصل شئ غريب علينا وعلى مجتمعنا".

وأضاف سعد: "الدكتور والدكتورة اللي عملوا واجبهم وتوفاهم الله بشرف.. الدكتورة اللي توفاها الله وهي بتقاوم مرض زي ده دفاعا عن الناس اللي خايفة عن ذويها.. البطلة دي مكانتش خايفة اللي رفضتوا تدفنوها.. عقلي مش قادر يصدق إن ده بيحصل.. الفلاحين بأخلاقهم بيقولو لأ دلوقتي".

• عمرو سعد
• كورونا
• الأطقم الطبية
• فيروس كورونا
• فيس بوك
• عمرو سعد
• كورونا
• الأطقم الطبية
• فيروس كورونا
• فيس بوك