مصرية مصابة بـ كورونا من داخل الحجر: اقعدوا في البيت.. الموضوع خطر
مصرية مصابة بـ كورونا من داخل الحجر: اقعدوا في البيت.. الموضوع خطر
نشرت مواطنة مصرية فيديو تم تداوله بشكل كبير على مواقع التواصل الاجتماعي، أكدت فيه إصابتها بفيروس كورونا المستجد ووجودها بالحجر الصحي، وكذلك وجهت عددا من النصائح للمصريين لعدم إصابتهم بالفيروس.
وقالت: "أنا في المستشفى في الحجر الصحي، أنا لو جاتلي أعراض فهي كانت خفيفة مش قوية، ونتيجة التحاليل طلعت إيجابية ولحد دلوقتي الفيروس موجود، خدوا الموضوع جد مش هزار خالص".
وأضافت: "خلو بالكم من نفسكم ومن أهلكم، وبلاش زيارات، وبلاش نقابل أصحابنا على إن الموضوع عادي، ودي كانت غلطة كبيرة جدا مني إني كنت بخرج وبنزل عادي".
وتابعت: "الموضوع مش بالاستهتار اللي الناس شايفاه، ومش بعيد عننا، وكنت متخيلة إنه مش هيجيلي وإنه بعيد عني طلع إن أي حد ممكن يصاب بيه".
ووجهت حديثها للمصريين: "أرجوكم خدوا الموضوع بجد مش باستهتار، ومتزوروش بعض، عشان ممكن تزور حد كبير في السن، وتؤذيه هو، وممكن أمك أو أبوك أو طفل صغير وأنت بتخرج وبتروح وتيجي وتنقل الفيروس لحد يأثر فيه، ممكن إحنا سننا صغير ومناعتنا ممكن تحارب الفيروس لكن ناس تانية لأ، والفيروس يؤثر عليها ويجرالها مضاعفات مش كويسة، وهي أمانة بينا وبين ربنا ونخلي بالنا من نفسنا واللي حوالينا".
وعن التكالب على السلع قالت: "بلاش تنزلوا تشتروا أكل بطريقة بشعة وجيبوا اللي يكفيكم، بس وبلاش البشاعة دي في التعامل مع الوضع أو الأنانية عشان إحنا في مصر في ناس غلابة متقدرش إمكانياتها إنها تجيب أكل لشهر ولا شهرين وتقعد في البيت، وفيه ناس بتجيب قوت يومها على قد النهاردة".
واختتمت: "خلو بالكم من نفسكم الموضوع خطر اقعدوا في البيت، دا الطريقة الوحيدة للوقاية لأن الخروج دلوقتي خطر لأن أنت ممكن تتعدي في مواصلات وممكن في شغلك أو أي مكان فحافظوا جدا لو مضطرين تنزلوا تشتغلوا وطول مأنت برا البيت متلمسش وشك، واغسل إيدك كل شوية، وأول متدخل البيت خصوصا لو عندك أطفال أو كبير في السن امسح المفاتيح وأوكر الباب وعقمها واغسل إيدك وربنا يحفظنا ويرفع عنا البلاء والوباء".
