"شيل الماسك واسترجل".. تامر حسني يهاجم شابا بسبب كورونا

01:55 م | الخميس 19 مارس 2020

كشف الفنان تامر حسني، تفاصيل موقف تعرض له، قبل ساعات، على خلفية الإجراءات الاحترازية والوقائية للحد من انتشار فيروس كورونا.

وكتب "تامر" عبر صفحته الرسمية على موقع التواصل الاجتماعي "فيس بوك": "أنا شوفت موقف قدامي صدمني مش قادر محكيهوش.. شوفت واحد بيقول لصاحبه: (ياد شيل الماسك ياد واسترجل) طب هو عشان في وجهة نظر حضرتك يسترجل فيكون سبب في موته وموتك وضرر كل من حوله.. معقول كل دول العالم المتطورة مؤمنة بالوقاية دي وإحنا بقى اللي عندنا الفهلوة والمفهومية كلها اللي بيتريقوا على الوقاية ده يأكد مسكتلوش وفهمته على قد ما أقدر وفهمته يا سيدي لو حتى أنت من الناس اللي بتقول ده وهم، مش هتخسر حاجة لما تاخد كوكب الأرض بالكامل على قد عقله وتحافظ على نفسك الكام يوم دول".

وتابع: "المشكلة إن في منه كتير بيفكروا زيه عشان كده كلنا لازم نتكلم كتير مع كل الناس عشان نوعي أي حد مش حاسس بالخطورة لازم نلتزم ونقعد في البيت 14 يوم يا ناس عشان نسيطر على انتشاره.. وميتحولش لوباء.. الصين انتصروا على الوباء لما التزموا ومنزلوش الشوارع نهائي ولو في ناس شغالة بيوميات لازم توصلهم يومياتهم لحد عندهم من باب الرحمة عشان ربنا يرحمنا يا جماعة.

وأضاف: "ده اختبار من ربنا وهننجح فيه لو اتعاملنا معاه صح وبمنتهى الرحمة والتعب وارد يحصل لأي حد فينا وهيخف إن شاء الله زي ما آلاف خفوا وخفوا من أمراض أكتر من كده بمليون مرة، وده مش أول وباء عالمي يمر علي البشر وغيرنا مر بأكتر منه".

واختتم حسني تدوينته قائلا: "دي فرصة للي مقصر في حق ربنا إنه يقرب منه تاني .. أهو دا جانب إيجابي لازم نشوفه لازم نشوف إن الصعوبات دي بتشيل من علينا كتير عند ربنا وربنا هيعوضنا خير عنها إن شاء الله ومننساش ندعي ربنا كتير لأنه هو خالق كل الكائنات دي و قادر إن يوقفها بمشيئته".