عربة نقل داخل الحرم الجامعى.. والحمولة «طوب وإخوان»
عربة نقل داخل الحرم الجامعى.. والحمولة «طوب وإخوان»
سيارة ربع نقل تطوف الجامعة، داخلها شباب يحملون فى أيديهم قطعاً من الحجارة والطوب، يمنعون الطلاب من الدخول إلى المدرجات، وإذا جاء الاعتراض من أحد تتحول ساحة العلم إلى أرض قتال.. مشاهد توقف أمامها محمد عفيفى، داخل جامعة حلوان، استفزه حرب طلاب الإخوان ضدهم، واستطاعتهم تخريب الجامعة وإيقاف الدراسة من حين لآخر «أول مرة تحصل فى كلية الهندسة بتاعتنا، طلاب الإخوان آخرهم كانوا بيجمعوا نفسهم ويفضلوا يهتفوا ضد الجيش، لكن باللى حصل ده إحنا عدينا جامعة القاهرة».
وضح الشاب العشرينى ورفاقه الطلبة الذين لا ينتمون لأى تيار سياسى، أنهم حاولوا الاستغاثة بقوات الأمن «قالوا لنا مينفعش ندخل جوه الجامعة عشان هما عايزين كده، ونصحونا نطلع للإدارة»، مضيفاً «الإدارة مصدقتش اللى بنقوله لأن لحد دلوقتى محدش عارف العربية دى دخلت الجامعة إزاى، ولما شافوا الصورة اللى صورتها نزلوا معايا ودخلوا الحراس وحاولنا نوقفهم».
نصف ساعة استغرقها «محمد» ورفاقه بمساعدة الإدارة للقبض على السيارة «طلعنا بعربية وحاولنا نوقف بقوا يضربوا علينا الطوب عشان منشفش ومش عارفين هما عايزين إيه، لحد ما خرجوا من باب تانى محدش كان واقف عليه وهربوا»، مشيراً إلى أن «الإدارة بعدها طلبت منى الصورة اللى صورتها ليهم وهما على العربية قبل ما يضربوا بالطوب، عشان يعرفوا يحددوا شكلهم ويمنعوهم من دخول الجامعة، وأصحابنا اللى فى القاهرة يصدقوا إن مش هما بس اللى عندهم إخوان، الإخوان فى كل حتة عايزين يخربوها».
