حسن شاكوش: أناشد الفنان هاني شاكر إيقاف "إعدامي" مهنيا

قال حسن شاكوش، إنه وبعد وفاة والده، تدمر نفسيا، ما أدى إلى توقفه عن لعب كرة القدم: "قعدت 3 سنين في البيت، ومكنش ليا أي مصدر دخل، وبعديها اتجهت أني أغني للفنان محمد العجوز، وكانت أول أغنية ليا أشكرك أوعدك، والدخلة بتاعتي كانت خش يا شاكوش يا جامد، علمت مع الناس وشهرتني".

وأضاف "شاكوش"، خلال استضافته ببرنامج "على مسؤوليتي"، الذي يقدمه الإعلامي أحمد موسي، المذاع على فضائية "صدى البلد"، أن جملة "خش يا شاكوش يا جامد"، حققت نجاحا كبير مع عدد من أهالي منطقته والأطفال: "صحابي كانوا بيحبوني أغني، وكانوا بيأجرولي الدوف علشان أغني، ومكنش معايا 2 جنيه، علشان أجر الدوف"، موضحا أنه كان يعمل كمغني أمام "الكوافير"، أثناء خروج العرائس منه: "كنت بلف ميت عقبة وفيصل والهرم وبولاق، وكنت بروح في نهاية اليوم بـ5 جنيه".

وأكد أنه يتفق مع كل الإجراءات التي تتخذها نقابة المهن الموسيقية: "المطرب هاني شاكر هو قدوة لينا، وبقوله أحنا عايزين نشتغل تاني، وبعد أذنك أحنا اتعاقبنا، وعايزين نشتغل تاني، لأن ورايا مسؤوليات وناس شغالة وفاتحة بيوت، ولو خرب بيتي أنا لوحدي أنا معنديش مشاكل، واشتغلت شغلانات كثيرة"، مشيرا إلى أنه تعاقب، ويناشد الفنان هاني شاكر إيقاف "إعدامه" مهنيا: "اعتذرت وأريد العودة للعمل، وعايز أشوف أكل عيشي".

وتابع: "أنا ماضي إقرار بعد أغنية بنت الجيران ما نزلت، أني أبدا شغل نضيف وأعمل حاجة نضيفة، والجمهور والناس بقوا بيسمعوني، ولازم يستفادوا مننا، ونطلعلهم حاجة كويسة وشغل يعيش، وامتحني الاستاذ أحمد رمضان وحلمي عبدالباقي وحمادة أبواليزيد".

• حسن شاكوش
• على مسؤوليتي
• نقابة المهن الموسيقية
• هاني شاكر
• مهرجانات
• حسن شاكوش
• على مسؤوليتي
• نقابة المهن الموسيقية
• هاني شاكر
• مهرجانات