هجوم ثلاثي على محمد رمضان بسبب الهضبة: عمرو دياب خط أحمر

02:02 م | الأحد 23 فبراير 2020

على إثر تصريحاته في برنامج "التاسعة" على القناة الأولى بالأمس، تعرض الفنان محمد رمضان لهجوم ثلاثي من الشاعر تامر حسين والموزع نادر حمدي والملحن عمرو مصطفى، دفاعا عن المطرب عمرو دياب.

تصريحات رمضان في مقابلته مع الإعلامي وائل الإبراشي، عن دور المحامي أشرف عبدالعزيز في أزمة الطيار الموقوف وكونه محامي أحد المطربين الكبار، أثارت حفيظة الثلاثي "نادر وعمرو وتامر"، الذين اتهموا الفنان بالتلميح لعمرو دياب، وقروا الرد عليه عبر صفحاتهم الشخصية على موقع "فيس بوك".

والبداية مع الشاعر تامر حسين، والذي قال: "الحقيقة مش عارف إحنا بقينا نستحل نتهم الناس بالباطل ازاى ؟ ..وهل يُعقل راجل مُتربع على قمة الغناء 30 سنة ومطرب وبيغني ويسلطن ومواكب ومتطور وشايل صناعة بحالها على كتافه ومشرف مصر بقاله سنين بسيرته وأعماله ونجاحاته وقدوة بجد للشباب ومختلف الأجيال والأعمار ومطرب كبير، مش بيقول (راب) ولا دخيل على الشُغلانة حايفكر يمنع ممثل أو مؤدي من الغُنا أو حايحاربك مثلاً ... ياجماعة اتقوا الله واعقلوا اللي بيتقال الناس مش حاتتعاطف مع الهزي ده الناس بتشمئز من الكلام اللي مفيهوش ريحة المنطق ... وربنا يهدي".

وتابع: "ياريت يا أستاذ يللي بتتهم الناس بالباطل نحافظ على رموزنا الحقيقين والمؤثرين بالإيجاب ونجومنا الكبار اللي فاضلين لنا عشان لما تبقى حضرتك ناجح 30 سنة على التوالي نتشرف بيك وب إنجازاتك وبسيرتك ونقف ضد اللي يمسك بكلمه .. الكبير له مقامه واحترامه وتقديره ... وياريت ننجح بشرف".

أما الفنان نادر حمدي فرد أيضا على رمضان، متهما إياه بمعاداة الهضبة، قائلا: "أنا مش غاوي أتكلم أوي بس معلش بقى إحنا عندنا حاجة في بلدنا متفقين عليها و ده قليل أننا نتفق بس (اللي مالوش كبير بيشتريله كبير)، و إحنا الحمد لله عندنا كبير في المنطقة دي و كبير أوي و مش بس في بلدنا مصر لأ ده في الوطن العربي والعالم كمان، فا مش منطقي إن أحنا نشوه كمان رموزنا اللي هما أصلاً مش كتير دلوقتي بس عمرو دياب ما ينفعش نتكلم عليه غير في شغله لأن هو ما بيعملش بجد غير شغله وأنا شاهد على ده".

وتداول الملحن عمرو مصطفى منشور الشاعر تامر حسين، معلقا عليه: "أعتقد أن رد تامر بسيط بالنسبه لو أنا رديت تقول نمبر وان على الممثلين الساكتين عن التجاوزات بتعتك ماشي ملناش دعوه لكن عند الغناء والموسيقي بلاش علشان هتزعل الموسيقى والغناء وعمرو دياب تحديدًا (خط أحمر )، وهو أنت بتمتهن مهنة أو ليك فيها عشان أي حد في المهنة يغير منك ويحاربك يابني أنت ماتعرفش السلم الموسيقي من سلم بيتك".