محل يوزع على "السناجل" دباديب وقلوب

08:21 م | الجمعة 14 فبراير 2020

يبدو أن «السناجل» الأكثر حظاً فى عيد الحب هذا العام، ففى الوقت الذى يشعرون فيه بالفراغ العاطفى، قام مصطفى محرز، صاحب محل هدايا بمنطقة المرج، بتوزيع «دباديب» صغيرة الحجم وقلوب حمراء مجاناً، لإدخال البهجة على قلوبهم وعدم الشعور بالوحدة.

«لكل سنجل.. انت مش لوحدك إحنا بنحتفل معاك»، هكذا احتفل «محرز» بالـ«فلانتين»، وخصص جزءاً كبيراً من مبيعات المحل لصالح غير المرتبطين، بتوزيع الهدايا عليهم: «من فترة كنت سنجل، وعارف إحساسه فى الفلانتين، ورود وهدايا رايحة جاية قدامه، فقررت أخليه يوم غير عادى فى حياته». وزّع «محرز» الهدايا عقب صلاة الجمعة، واستمر حتى ١١ مساءً: «واقف طول اليوم قدام باب المحل أوزع على أولاد وبنات المنطقة هدايا»، الفكرة التى طبّقها للعام الثانى على التوالى، فاجأ بها «سناجل» منطقته: «ناس كتير جداً فرحوا رغم إن الهدايا بسيطة جداً، وحسوا إن فيه حد فاكرهم، وقدرت أغير فكرتهم عن الفلانتين».

لم يوزّع «محرز» الهدايا على الشباب فقط، بل كان للكبار والأطفال نصيب منها: «باشوف إنهم أولى بالاحتواء والكلمة الحلوة فى اليوم ده»، كما احتفل مع العاملين بالمحل وأهله بنفس الطريقة: «يوم الفلانتين الشارع كله بيقلب لونه أحمر، وشكل المنطقة بيكون حلو ومبهج جداً، ودى حاجة بتسعدنى إن يوم فى السنة كلنا نفرح فيه». ينوى صاحب المحل تكرار مبادرته كل عام فى عيد الحب، حتى يحتفل الجميع من حوله: «ربنا ما يقطع لى عادة ويفضل الحب موجود بينا على طول مش يوم واحد وخلاص».