سيد رجب من احتفالية القبائل العربية: حاسس إني وسط عيلتي
سيد رجب من احتفالية القبائل العربية: حاسس إني وسط عيلتي
- القبائل العربية
- احتفالية القبائل العربية
- سيد رجب
- القبائل
- القبائل العربية
- احتفالية القبائل العربية
- سيد رجب
- القبائل
تحدث الفنان سيد رجب، أحد المشاركين في تقديم احتفالية مجلس القبائل والعائلات المصرية باستاد القاهرة، للحاضرين عن مصر وأهلها.
وقال رجب: "مساء الخير على كل أسرة، وعلى كل عيلة وعلى كل قبيلة، مساء الخير على أهل بلدي، كنت بفكر يعني إيه بلدي، يعني إيه وطن، مصر يعني إيه، وهل هي الحدود الجغرافية اللي كلنا عارفنها، هل هي نيلنا العظيم والمدن والمحافظات، هل هي الأهرامات وتاريخنا العريق".
وأضاف: "صحيح، مصر كل دا، بس أنا لما بسافر برا مصر، بشتاق لمصر، بشتاق لمين؟ لولادي لمراتي وخواتي، لصحابي وجيراني، لعم سعيد صاحب الكشك، لزمايلي في المسرح، لزمايلي وأن بعمل آخر مسلسل عن الأسرة والعيلة".
وتابع: "أنا بشتاق للعيلة، بشتاق ليكم كلكم، أهلي وناسي وسندي لما بكون محتاج للسند، أكيد منكم اللي سافر برا مصر، عاش التجربة دي، لما شاف واحد مصري زيه في الغربة، حس إنه شاف مصر كلها، يمكن الأجيال الجديدة لسه متعرفش يعني إيه عيلة، بس لما يكبرا هيعرفوا، هيعرفوا إن العيلة هي الوطن، العيلة هي مصر، كل عيلة فيها كبير، كبير بحبه وعطفه، كبير بحكمته وخبرته وعلشان كدا لازم نحترمه ونجله ونسمعه ونتعلم منه، وعندنا في مصر بقى كتير".
واستطرد: "كل عيلة وكل نجع وكل قرية وكل مدينة فيها ناس كبار لازم يتحطوا على الراس من فوق، كنت بقول لابني لازم تحترم الكبير، عشان بكرا هتبقى أنت الكبير دا".
واختتم: "مش عايز أطول عليكم، وأنا واقف دلوقتي في وسطيكم حاسس بالحب والدفا والأمان، يارب احفظ لمتنا".
وهتف: "تحيا مصر"، ليردد الحاضرون خلفه: "تحيا مصر"، متابعا: "يارب احفظها واحفظ لمتها قولوا أمين"، ليرددوا خلفه: "آمين".
