"الفرحة للجميع".. توزيع حلوى المولد على أقباط بني سويف

حتى لا يقتصر الاحتفال بالمولد النبوى على المسلمين فقط، قرّر عدد من الشباب فى مركز الواسطى التابع لمحافظة بنى سويف، توزيع قطع حلوى المولد النبوى على 45 أسرة من الأقباط الموجودين فى المركز، رافعين شعار «معاً للخير».

للعام الثالث على التوالى، ينفّذ الفريق الفكرة، حسب على محمد، مؤسس الفريق الشبابى، الذى يروى أن الفكرة خطرت لهم بسبب بداية نشاط الفريق بالتزامن مع الاحتفال بالمولد النبوى: «ده كان أول نشاط نعمله من 3 سنين، قُلنا نفرّح كل أهالى البلد، وزّعنا حلاوة المولد على الكل، بدون تفرقة بين مسلم ومسيحى، بالعكس فيه كتير من الأقباط دلوقتى لو اتأخرنا عليهم ييجوا يسألوا عن الحلاوة».

"على": وزّعنا ٣٥٠ كيلو دفعة أولى والتكلفة بالجهود الذاتية

وينفذ الفريق الكثير من النشاطات المختلفة عن طريق جمع التبرعات: «إحنا بندى الناس الحلاوة كهدية ونوع من المحبة والود اللى بينا، عندنا فى البلد نسبة كبيرة من الأقباط من حقهم يفرحوا معانا، المتبرّعين للفريق والجمعية مننا وأصدقائنا وأصحابنا»، جولات الفريق بأعمال التوزيع شملت مناطق مختلفة بالمركز، مثل عزبة أبوطالب، العدالية، العزبة البيضاء: «عددنا 11 فرد، وزعنا دفعة أولى 350 كيلو حلاوة مختلفة الأصناف، وهدفنا إننا نرسم الابتسامة على وش الغلابة، هما بيفرحوا من أبسط وأقل حاجة بتتقدم لهم».

لم تقتصر مشاركة الفريق للأقباط على هذه المناسبة فقط: «إحنا بنخليهم يشتركوا معانا فى كل المناسبات اللى بنحتفل بيها، بنوزع عليهم لحمة فى عيد الأضحى، وشنط غذائية فى رمضان، إحنا أهالى مركز واحد ومع بعض على الحلوة والمرة، وهى دى عادة المصريين دايماً».

• مولد النبي
• حلوي مولد النبي
• محافظة بني سويف
• محافظات
• أسر الأقباط
• مولد النبي
• حلوي مولد النبي
• محافظة بني سويف
• محافظات
• أسر الأقباط