أحمد فلوكس يرد على اتهامه بـ"الأفورة" في ندوة القوات المسلحة
أحمد فلوكس يرد على اتهامه بـ"الأفورة" في ندوة القوات المسلحة
ردّ الفنان أحمد فلوكس، على اتهامه بـ"الأفورة"، وزيادة حدة الانفعالات، خلال مشاركته في الندوة التثقيفية الأخيرة للقوات المسلحة، وخاصةً أثناء عزف السلام الجمهورية.
وقال فلوكس، خلال مقطع فيديو، نشره عبر قناته على موقع الفيديوهات الشهير "يوتيوب": "اتعلمت لما النشيد يشتغل في المدرسة أو العرض المسرحي، أو مباريات الكرة كنا بنقف انتباه، لأنه نشيد بلدنا، مين ميحبهوش، هل المفروض نتحزم ونرقص؟!، دي بلدنا والنشيد هويتنا، دي مش أغنية حمو بيكا".
وأضاف: "لازم نقف رجالة محترمين، نسند إيدينا على وسطنا، ده اللي شفناه ومرينا بيه في حياتنا، والكلام ده مش في مصر، في أمريكا وألمانيا وغيرهم بيقفوا انتباه، ومعتقدش إن وقفتي فيها مبالغة".
وعن اتهامه بالمبالغة، بسبب تكرار زياراته لمدارس الأطفال، في أعقاب عرض فيلم الممر -الذي شارك فيه- على التليفزيون، قال فلوكس: "منذ 4 سنوات، وأنا سفير لعدد كبير من حملات الخير، مثل حملة فيروس سي، والكشف على الأطفال".
وأردف: "أنا ابتديت كومبارس، والناس هي اللي عملت اسمي لأنها حبت شغلي، ولما تيجي دعوة ليّا وأعمل للناس شيء خير، أقول لأ؟".
وعن صورته المتداولة على مواقع التواصل الاجتماعي، أثناء تواجده في إحدى المدارس، قال فلوكس: "لما يبقى في قرية، في آخر حدود الفيوم، وهي بعيدة عن أي إعمار، وأهلها مش بيخرجوا برة، بيوتهم كانت عاوزة توضيب، ومفيش سقف ومياه، وصناع الخير ومبادرة حياة كريمة وضبوا الكلام ده، الصورة مكنتش في مدرسة ولا حاجة، هم فصلين، فصل للبنات، وفصل بنات وولاد، واتقالي تعالى يا أحمد، لبست أحلى حاجة عندي، مش تعالي، لكن لأني رحت أقابل ناس أنا بحبها، فهل ده مبالغة؟".
وقال أحمد فلوكس، ردا على الحملة، التي يتعرض لها، على خلفية مشاركته في فيلم الممر، إن هذه الحملات لم تبدأ به شخصيا، حيث سبقت وأن تعرضت لبعض المشاركين في الفيلم، مثل الفنان أحمد عز.
وأشار "فلوكس" خلال مقطع فيديو، نشره عبر قناته الرسمية على موقع الفيديوهات الشهير "يوتيوب"، إلى أن القنوات التابعة لجماعة الإخوان الإرهابية شاركت في الحملة: "ظهر أمس من القنوات اللي اشتغلت، إن كل هذا لم يظهر فجأة".
وعن اتهامه بالمبالغة في إظهار الانفعالات، خلال أحداث الفيلم، وبعض المناسبات التي ظهر فيها بعد عرض الفيلم على شاشت التلفزيون: "بيقولوا مثلًا إني أوفر، أو ببالغ ، لما ألاقي إن العمل بقاله سنين ومتعملش زيه، والناس فرحت، مش حقنا إننا نفرح بنجاحنا، لما كنا عيال صغيرة بناخد نجمة، كنا بنفرح، مجدي عبدالغني جاب جول في كاس العالم نفخنا 20 سنة، عادي يعني".
وشدد، على أن الفيلم أدخل السعادة على قلوب المصريين، مدللًا على ذلك بالنجاح الكبير الذي حققه الفيلم: "ده معجبش ناس تانية وهي اللي عملت الحملة دي".
وبالنسبة لاتهامات المبالغة "الأفورة"، المتعلقة بهيئته، خلال حضوره مع أبطال الندوة التثقيفية الأخيرة للقوات المسلحة، والتي كرمهم فيها الرئيس عبدالفتاح السيسي، قال: "لما حد يكرمك، هتقول له مش هتروح، ولما الناس اللي بتكرمنا دي، بيكونوا بيضحوا بحياتها عشان حضرتك تبقى قاعد بتكتب الكوميكس وتضحك، منقلهمش شكرًا، ولما حد بيعزمك على حاجة، بتقول شكرًا لأ، ولا بتقبل؟!".
