حمام متنقل لخدمة الكلاب: استحمام وقص شعر ورسم على الوجه

07:35 م | السبت 28 سبتمبر 2019

«حمام متنقل للكلاب»، مشروع خاص خطر فى ذهنه بسبب حبه الشديد للحيوانات الأليفة، فقرر تنفيذه على الرغم من اندهاش البعض من فكرته، ياسر الشافعى، أحد محبى الحيوانات الأليفة، هو صاحب المشروع الذى حقق نجاحاً منذ بدايته: «أنا وأخويا بنربى حيوانات من أكتر من ٢٥ سنة، كان نفسى أنفذ فكرة مبتكرة مفيش زيها، واجهت كمية طاقة سلبية كبيرة فى البداية من كل اللى كان بيسمع عن الفكرة لكن بعد كده اقتنعوا بمشروعى».

يصف «ياسر» الحمام المتنقل بأنه عبارة عن سيارة نقل تحتوى على بانيو، ومستحضرات عناية بالكلب، ومستحضرات طبية للإسعافات الأولية، شاشة عرض «آيباد»: «أخدت ٨ شهور فى تجهيز العربية، كنت بنام جنبها وهى بتتنفذ عشان أشرف على كل خطوة فيها، العربية فيها كل مستلزمات العناية بالكلب، سواء التعقيم أو العناية بالجلد أو عمل قصات شعر مختلفة ورسومات على الوجه، وبندى للعميل آيباد علشان يقدر يتفرج على كل حاجة بتحصل للكلب بتاعه من جوه بيته».

يوفر المشروع سيارتين «فان» لتغطية كل الأحياء بمحافظتى القاهرة والجيزة: «بنوفر 15 خدمة للكلاب، وبنروح مناطق زى مصر الجديدة، التجمع، الشروق، العبور، المعادى، القطامية، المقطم، مدينة نصر، أكتوبر، الزمالك، والإقبال حلو جداً فاق كل التوقعات».

وحسب «ياسر» فإن الفريق أنقذ بعض الكلاب من حالات تسمم: «فى كلاب بتلحس المبيدات الحشرية وبيجيلها تسمم، إحنا أنقذنا 10 كلاب».

وتتراوح تكلفة الخدمة المقدمة بين ٥٠ و٥٠٠ جنيه: «إحنا طوَّرنا نفسنا وعندنا دلوقتى فى التيم ورك بتاعنا طبيب بروفيشنال من نيجيريا، عامل دبلومة فى سلوكيات قصات الشعر، بيعمل قصات مبتكرة»، وتبدأ السيارة فى استقبال الزبائن بدايةً من ١٢ ظهراً وتستمر حتى ١٠ مساءً.