صالون تجميل: هات طبق فتة.. تاخد خصم
صالون تجميل: هات طبق فتة.. تاخد خصم
«خصومات بمناسبة عيد الأضحى هتستفيدى منها لو جبتى معاكى طبق فتة».. عرض خاص ومختلف قدمه «بيوتى سنتر» فى منطقة منشأة ناصر لزبائنه من السيدات، بشرط أن يحضرن معهن طبق فتة، هكذا احتفل أمير عكاشة، مسئول صالون التجميل، مع زبائنه بعيد الأضحى، بتقديم عروض تخفيض كبيرة على قسمى تجميل البشرة والشعر.
«بروتين الشعر 500 جنيه لأى طول، صبغة الشعر 170 جنيهاً، تنظيف عميق للبشرة 50 جنيهاً، حمام مغربى 50 جنيهاً».. بعض الخصومات التى قدمها «أمير» لتوفير التكلفة الباهظة على السيدات اللاتى يترددن على صالونات التجميل فى العيد: «قررت أحتفل بطريقة مختلفة السنة دى، همّا ييجوا يعملوا كل اللى عايزينه شعر أو بشرة، وفى نفس الوقت إحنا هنفضل فاتحين طول العيد عشانهم، بس يجيبوا لنا الفتة وناكل سوا»، ولأول مرة حسب «أمير» يقدم الصالون هذه الخصومات: «فى الأيام العادية البروتين لوحده بيتراوح بين 2000 و4000 جنيه، يعنى مايجيش ربع حقه».
استعد صالون التجميل لاستقبال أعداد كبيرة من السيدات، قبل الإعلان عن هذه الخصومات: «كنت متأكد إن ناس كتير هتبقى عايزة العرض لأنه رخيص جداً مقارنةً بالأسعار فى مجال التجميل، وطبق الفتة اللى طلبناه حاجة بنجذب بيها الزبون وفى نفس الوقت نحتفل بالعيد مع بعض، ناكل الفتة واللحمة ونقوم نعمل جلسات التجميل»، بحسب «أمير»، الذى تلقى حجوزات كثيرة، خصوصاً على عرض بروتين الشعر والصبغة: «يمكن عشان دول أغلى حاجتين بيتعملوا فى السوق فالطلب عليهم زيادة»، وسيتم مد العرض لمدة 7 أيام، بعد العيد، بسبب الإقبال الكبير.
