"تنمر وسخرية ثم اعتذار".. سلسلة أزمات محمود العسيلي مع جمهوره
"تنمر وسخرية ثم اعتذار".. سلسلة أزمات محمود العسيلي مع جمهوره
"معاك واسطة؟، جامد جدا مثلا، يعني أنت بس اللي بتحبني، والناس دي كلها بتكرهني مثلا"، رد صادم من المطرب محمود العسيلي، على معجب طلب التصوير معه، في إحدى الحفلات، وسط علامات استفهام عديدة من الحضور.
الموقف ما هو إلا حلقة ضمن سلسلة من الأزمات، التي تمر بها علاقة محمود العسيلى بجمهوره، قبل أن يخرج للاعتذار ويصف ما حدث بـ "حسن نية".
قبل الموقف الصادم بأيام، دخل العسيلي في صدام مع إحدى المتابعات عبر حسابه على "إنستجرام"، عندما علقت على إحدى صوره مع فتاة، قائلة: "ما هو يا تعلن علاقتك بيها زي البني آدمين أو تبطل تنزل صور زي دي"، ليصفها بـ "الحشرية" قائلاا، "حضرتك مش ملاحظة إنك حشرية زيادة عن اللزوم وبتحشري نفسك في حاجات وخصوصيات بجد إنتي مالكيش أي دعوة وأول مرة أعرف إن الفراعنة بيحطوا مناخيرهم في اللي ملهمش فيه"، ولكنه قام بحذف التعليق بعد ذلك.
هجومه على ميريام فارس بعد تصريحها الأخير عن سبب قلة حفلاتها في مصر، ليصفها فى تغريدة على "تويتر" بـ "كارتة" و"خانفة"، أغضب بعض مستخدمي مواقع التواصل الاجتماعي ووصفوا ما قام به "العسيلي" بالتنمر.
العسيلي غرد مرة أخرى معتذرا: "إلى كل البني آدمين اللي شعركوا كيرلي أو أكرت أحب اقولكو ان أمي شعرها أكرت، وأنا كنت أكرت قبل ما أبقى أقرع، وباعتذر لو سببت أي حساسية، الموضوع مالوش أي دعوة بشعركوا التحفة الجميل اللي ربنا خلقه كدة، أنا أقصد واحدة بس خانفة وكارتة استهزأت بمصر فقلت أردحلها شوية بالبلدي"، ولكن الاعتذار زاد الطين بلة لترتفع حدة الهجوم.
في عام 2018، شن هجوما على الملحنين والشعراء الشباب عبر حسابه على "تويتر"، قائلا: "الإخوة اللي عايزين يبقوا ملحنين أو شعراء اللي بيبعتوا على الواتس آب الخاص ويكلمك فجأة على إنه متربي معاك وإنكو كنتوا مع بعض في المدرسة ويبعتلك إسهال من الأغاني وسبحان الله كلهم الجو بتاعك ولايقين عليك وباعتهملك مخصوص.. بلوك مع جزيل الشكر"، وانتقد مجموعة كبيرة من المتابعين أسلوب "عسيلي" في الرد على هؤلاء الشباب، حيث وصفه البعض بـ"القاسي".
ورد "العسيلي"، على الهجوم الذي أثير ضده بـ"واضح من رد الفعل على التويتة الأخيرة إن الناس مبتفهمش يعنى إيه خصوصية بنى آدم، ومش فاهمين بردو الفئة اللى أنا باتكلم عليها من الناس اللى بتطاردك على تليفونك والواتس آب بتاعك بشكل جنوني، وطلعت أنا جالد المواهب الشابة ومغرور وتنك وشايف نفسى ومدعي".
