نفحات «دورى الأبطال»: خصومات على الملابس.. و«مو» كلمة السر

10:16 م | الأحد 02 يونيو 2019

«فرحة العيد بطعم محمد صلاح»، شعار أطلقه محبو النجم العالمى من أصحاب المحال، ومصورى الأفراح، احتفالاً بفوز اللاعب محمد صلاح، نجم المنتخب المصرى، ونادى ليفربول الإنجليزى، ببطولة دورى أبطال أوروبا، وإحرازه أحد هدفى الفوز فى المباراة.

عبدالله سيف، صاحب محل لبيع الملابس بالفيوم، نقل فرحته بالفوز إلى زبائنه فى المحل، فقدم خصماً 20% على كل البضائع، ووزّع قطع شيكولاته عند بيع «طقم العيد»، محبة فى الإنجاز الذى حققه «مو»، يقول: «صلاح بالنسبة لينا أيقونة نجاح، وأى إنجاز بيعمله بنحب نفرح الناس على حسه».

صاحب محل: المبيعات زادت.. و"صلاح" أيقونة نجاح

المبادرة نشّطت حالة الركود التى حلت بالموسم منذ بدايته، حسب «عبدالله»، مضيفاً: «الدنيا كانت نايمة أوى بسبب الامتحانات، لكن الخصم خلّى الناس تنزل وتشترى، والحمد لله الدنيا ماشية».

مبادرة صاحب "سنتر" بالإسكندرية و4 مكاتب للملابس الجاهزةمحبته لـ«فخر العرب»، دفعته إلى مفاجأة زبائنه فى المحل بتقديم خصم 30% على أى قطعة ملابس. يقول أحمد محمود، صاحب محل فى أسوان: «كلنا بنشوف نفسنا فى أى نجاح بيحققه محمد صلاح، وبنحس إنه واحد مننا، والخصومات دى أقل حاجة نقدمها له، هدية الفوز بالبطولة».

الخصم أسعد زبائن المحل خلال وقت المباراة، وفقاً لما يرويه «أحمد»، الذى استطرد قائلاً: «الناس اللى كانت بتشترى وقت الماتش فى المحل، اتبسطوا وهما بيحاسبوا، والحركة دى خلتهم يشتروا كل اللى نفسهم فيه».

حظيت الأفراح المتعاقد على إقامتها خلال فترة العيد، بنصيبها من الفرحة بابن قرية «نجريج»، فأعلن بعض المصورين تقديم خصومات على جلسات التصوير، وصلت إلى نصف الثمن، والتى عادة تتراوح أسعارها خلال موسم العيد بين 1000 و5000 جنيه، فيقول «إبرام صبحى»، مصور: «إحنا اقتبسنا جملة (انت تقدر) علشان تبقى شعارنا، وزى ما صلاح قدر يفرّحنا عالمياً، إحنا كمان نقدر نفرح الناس بطريقتنا».