رمضان زمان.. مسحراتى الفن
مسحراتي
إن المسحراتى هو الفنان الذى يظهر فى شهر رمضان المبارك من كل عام ليجعل من الطرب والشعر خدمة للصائمين.. فماذا يقول المسحراتى عندما يوقظ الفنانين ليصوموا رمضان؟.. إن الأستاذ بديع خيرى يتحدث بلسان المسحراتى الممثل عبدالحميد زكى:
إصحى يا يوسف بيه
النوم ده كله ليه؟
الصوم ده حق علينا
وبكرة نجزى عليه
إصحى وادعى وقول
يا رب يا موجود
تديم علينا الصحة
ونبذل المجهود
وتخلى مسرح مصر
يصبح عليه القيمة
وتنصره يا رب
على الهبابة السيما
وتندر انك تفضل
للفن ده خادم
ووحّد الدايم
وانتى يا ست مديحة
خديها منى نصيحة
تصومى ولا تاكليش
إلا يا دوب ع الريحة
عشان تحافظى يا بنتى
على قوام الغيد
وبعد صوم رمضان
نتهنى يوم العيد
وادعى واطلب لك
يومى فى كل مساء
إنه يخلى لك
قرة عنيكى وفاء
ولا تتبليش ياختى
بقولة اللايم
ووحّدى الدايم
وانت ياسى أنور
نايم وبتشخر
افرك عنيك ياللا
وقوم بقى اتسحر
وبقلبى ها ادعى واقول
للخالق الرحمن
ترجع إليك ليلى
وتبقوا زى زمان
ويرزقك مولود
والخير يكون تامم
ووحّد الدايم
يا مدموازيل ماجدة
عنيكى ليه ساهدة
يكفيكى شر العين
الزايغة والحاسدة
ويرزقك بعريس
يكون على قدك
ويبقى طول العمر
هو سبب سعدك
وتصلى وتصومى
لربك العالم
ووحّدى الدايم
وانتى يا «فتونة»
بالظرف معجونة
أنا جاى أصحيكى
دى الليلة ميمونة
وادى السحور قرّب
وبكرة حاتصومى
وربنا يقدّر
على الصيام يومى
وكل يوم حا ادعى
فى الفرض والسنة
إنشا الله تتحدفى
فى الآخرة ع الجنة
ده بعد عمر طويل
السعد فيه دايم
ووحّدى الدايم
بديع خيرى
الكواكب 1954