الاسم: عسكر.. والمهنة: محمد رمضان

11:21 م | الخميس 23 مايو 2019

عشقه للفنان محمد رمضان، وإجادة تقليد أدواره وشخصه، إضافة إلى الشبه بينهما فى الملامح، جعل من حوله يشبّهونه به، ويطلبون منه تقديم «اسكتشات» تمثيلية بأداء يشبه نجمهم المفضل.

محمد عسكر، 21 عاماً، من محافظة الإسكندرية، كان الشبه بينه وبين محمد رمضان «فتحة خير» له، بحسب وصفه: «الناس بيحبوا رمضان، وبيحسوا إنه واحد منهم، وأنا بعشق تمثيله من زمان، وبحب نجاحه».

منذ 3 سنوات، بدأ «عسكر» رحلته فى التقليد بالحفلات، والتمثيل بمسارح الإسكندرية: «بقلّد مشاهد من الأفلام والمسلسلات، وأؤدى الأغانى اللى بيقدمها رمضان، خاصة فى الحفلات اللى فيها أطفال، لأنهم بيحبوها جداً، وبيتفاعلوا معاها بشكل كبير»، ويتراوح أجره فى الحفل بين 1.500 و3000 جنيه. «بقى ليّا اسم فى إسكندرية، ومعارف كتير فى الوسط، وتقليدى لرمضان كان وش السعد عليّا»، يقولها «عسكر»، الذى أسعده كثيراً نشر النجم محمد رمضان لفيديو ظهر خلاله وهو يقوم بتقليده، عبر صفحته الخاصة على «إنستجرام»: «نزل فيديو ليّا من سنة فى استورى، وكنت مبسوط جداً، حسيت إنى فعلاً بقلده، وده مش مجرد آراء لناس».

شخصية فالح عبدالسميع، التى جسدها محمد رمضان بفيلم «واحد صعيدى»، يعشقها «عسكر» ويتقن تقديمها على المسرح: «الفيلم كوميدى جداً وبحب أقلده عشان الأطفال بتضحك، خصوصاً فى الحفلات الخيرية»، حيث إنه يشارك فى بعض الحفلات متطوعاً: «مش كل الحفلات بآخد عنها أجر، فيه حفلات بتكون للخير، ويكفينى رسم الابتسامة على الوشوش».