"ناس هايصة وناس لايصة".. إجازات أبريل للموظفين بين الموافقة والرفض

01:41 م | الأحد 14 أبريل 2019

بين "عيد تحرير سيناء وعيد القيامة وشم النسيم وعيد العمال".. تعددت الإجازات الرسمية بين نهاية أبريل ومطلع مايو، والتي تأتي في أوقات متقاربة، ما يدفع بعض الموظفين إلى استغلال الأمر وطلب إجازة يومي 30 أبريل و2 مايو المنفصلين عن الإجازات الرسمية، للحصول على 10 أيام متواصلة.

يقول محمد حسن (29 عامًا)، يعمل في إحدى البنوك الخاصة، لـ"الوطن"، إنّ المديرين قرروا تقسيم الإجازات حسب هوى الموظفين، كي لا يشعر أحدهم بتفرقة أو حزن: "يعني في ناس هتاخد إجازة تبدأ من 23 أبريل ويرجعوا ويجوا يوم التلات والخميس، وياخدوا الأحد كمان إجازة، أما الباقي فهياخد 10 أيام متواصلة، عشان الكل يبقى حاسس بالرضا".

نادين فؤاد (27 عامًا)، تقول إنّ شركة السياحة التي تعمل بها سترفض طلب إجازات باليومين المنفصلين عن الإجازات الرسمية، ما يجعلها تشعر بغضب كبير كونها كانت تنوي السفر إلى الساحل الشمالي للراحة والاستجمام: "حاجة فصلان جدا يعني، هيحصل إيه لو وافقوا على الإجازة، مين يعني هييجي يحجز شهر عسل في اليومين دول".

تحاول الفتاة العشرينية التفكير في حيلة للحصول على إجازة في تلك الأيام، إلا أنّها لا تزال تفكر في الحل: "مش عارفة لسا بس يعني لو حتى هاخده بخصم بس اريح دماغي شوية، أصلها فرصة حلوة كده جات من عند ربنا الواحد يفصل فيها".

يستغل شادي سامي (35 عامًا) هذه الفترة، للحصول على إجازة طويلة، كونه صاحب شركة في الدعاية والإعلان، يجعل الأمر سهلا في التحكم في الأمر، فضلا عن إعطائه إجازة لجميع الموظفين: "مش اليومين دول هما يعني اللي هيعملوا حاجة، الناس دي شيلاني طول السنة، وبعدين لو في حاجة نقدر نتابعها من خلال الإنترنت هيكون التواصل سهل".

قررت آية سعيد (30 عامًا)، الخروج عن المألوف بشكل غريب، فهي لم تطلب إجازة في اليومين المنفصلين، وتنوي الخروج من المأزق بـ"كذبة بيضاء" وفقا لوصفها: "لو قلت دلوقتي هيرفضوا، فأنا بقى هاجي وقتها أقولهم أنا عيانة أو في مشكلة في البلد ولازم أنزل، أو أي حاجة، وأريح دماغي، هما مينفعش معاهم الصراحة".

والإجازات المقبلة تكون 25 أبريل عيد تحرير سيناء، والجمعة والسبت إجازة أسبوعية، والأحد 28 أبريل عيد القيامة، والإثنين 29 أبريل شم النسيم، والأربعاء 1 مايو عيد العمال.