لافتات تكريم من أهالى الدرب الأحمر لـ«شهيد الإرهاب»: ده أقل واجب

08:24 م | الاثنين 25 فبراير 2019

فاجعة استشهاد أمين الشرطة محمود أبواليزيد خلال تفجير الدرب الأحمر، أصابت أهالى المنطقة بالصدمة والحزن الشديد على ابن الحى الطيّب الشهم، فقرّروا تكريمه بطريقتهم، وهى تعليق لافتات تتضمّن اسمه وصورته، مرفقة بكلمات الرثاء، وذلك فى شوارع الحى الشعبى.

خمس لافتات فى شوارع «زرع النوى»، و«باب الخلق»، ومنطقة «البيبانى» و«المغربلين»، تنعى البطل الذى فقد حياته، لكن روحه ما زالت تسكن قلوب جيرانه وأصدقائه، وحسب محمد حماصا، الذى علق لافتة كبيرة فى شارع زرع النوى باسم عائلة العرقسوسى: «ده أقل واجب علشان الشهيد ماكانش مجرد جار، كان صديق مقرب». مضيفاً: «الله يرحمه كان محترم وجدع ورجولة، عمرنا ما شُفنا منه حاجة وحشة أبداً، بالعكس كان أى مشكلة الواحد بيتعرّض لها، كان بيتصدّر للموضوع ويحله فى ثوانى، وفى غير أوقات الشغل، كنا أصحاب مقربين، نقعد سوا، أو نتفرج على ماتشات الكورة».

وفى منطقة «باب الخلق»، هناك لافتة أخرى كتب عليها أيضاً «شهيد الواجب والوطن.. محمود أبواليزيد» مع صورة كبيرة له، قال عنها شادى عطية أحد سكان المنطقة: «محمود كان صاحبى، وكتفه بكتفى، كان أطيب شخص ممكن تتعامل معاه، يكفى أنه قبل الحادث كان بيرتب إنه يروح يعمل عمرة، واللافتات دى ولا حاجة جنب شهامته وجدعنته، بنحاول من خلالها نرد له جميله علينا ولأهله».

مضيفاً: «للأسف الإرهاب عمره مش بييجى غير على الناس الطيبة البسيطة، ودى مش أول مرة المنطقة تشوف حادثة تفجير زى ده، قبل كده من 5 سنوات حصل برضه تفجير إرهابى عند مديرية أمن القاهرة، وعمرنا ما نسينا آثاره المفزعة، ولا هننسى، ودعوتنا أن يا رب مصر تقضى عليه نهائياً علشان نعرف نعيش فى سلام».