أولياء أمور يشكون من تنسيق «التجريبى»: أسماء أولادنا ما نزلتش

07:30 م | الاثنين 11 فبراير 2019

حالة من الضيق انتابت عدداً من أولياء الأمور الذين سجلوا بيانات أطفالهم على موقع التنسيق الإلكترونى الخاص بالمدارس التجريبية بالإدارات التعليمية المختلفة الموجود على موقع وزراة التربية والتعليم منذ انطلاقه فى شهر يونيو الماضى، بسبب عدم نزول أسماء أبنائهم فى كشوفات المقبولين بالمدارس التجريبية، رغم توفر الشروط العمرية بهم، معبّرين عن تخوفهم من ضياع سنة من عمر أبنائهم وتفويتهم لعام دراسى.

«تنسيق رياض الأطفال فى المدارس التجريبى نزل شهر 6 اللى فات وبدأ من 5 سنين لـ6 إلا يوم، وقدمت فيه لبنتى، ولحد النهارده ما اتقبلتش فى أى مدرسة».. هكذا بدأت أمانى شريف، عضو جروب اتحاد المدارس التجريبية على «فيس بوك»، حديثها عن مشكلة يعانى منها العديد من أولياء الأمور منذ أشهر، بعد افتتاح التنسيق الإلكترونى وإتاحته على موقع وزارة التعليم، آملين فى حصول أبنائهم على تعليم أفضل، موضحة أنها سجلت بيانات طفلتها ذات الـ5 سنوات و4 أشهر و26 يوماً على موقع التنسيق فى إدارتَى الهرم والعمرانية نظراً لقربهما من مسكنها، وأنها تتابع نتيجة التنسيق كل 15 يوماً لتعرف إذا كانت طفلتها قد قبلت أم لا: «التنسيق بينزل كل 15 يوم، وممكن يقعد أكتر والإدارات التعليمية بتبدأ بأعلى تنسيق، والمشكلة إن السن فى التنسيق بينزل بالأيام فى كل مرحلة مش بالشهور».

{long_qoute_1}

وتضيف: «لما رُحت إدارة الهرم قالولى إنسى، مافيش مكان لبنتك لأن دلوقتى التنسيق واقف عند سن 5 سنين و8 شهور»، وتكمل: «المشكلة إن فيه ناس بتقدم فى أكتر من إدارة وأولادهم بيتقبلوا فى أكتر من مدرسة وما بيودوش عيالهم، وده بياخد من حق طفل تانى فى نفس السن، ويضطر يستنى التنسيق اللى بعده»، لافتة إلى أنها فى حالة عدم قبول ابنتها فى التنسيق المقبل ستتقدم بشكوى لوزارة التعليم: «عيالنا ضاعت عليهم السنة لو مانزلوش فى التنسيق الجاى، ومش هدوّر على مدارس خاصة لأنى مش عاوزاها وكان زمانها دلوقتى فى أولى ابتدائى».

وعبّرت جيهان كامل، ربة منزل تقيم بمنطقة أرض اللواء، عن خوفها من ضياع فرصة ابنتها «نور» فى الالتحاق بمدرسة تجريبى فى إدارة العجوزة أو العمرانية التعليمية، خاصة بعد بلوغها سن 6 سنوات فى الثامن والعشرين من الشهر الحالى، ما يقلل فرص قبولها بالتنسيق: «قدمت لبنتى وهى عندها 5 سنين و4 شهور فى إدارتين، ودلوقتى فى المرحلة السابعة من التنسيق ولسه اسمها مانزلش، ولما رُحت الإدارة التعليمية قالولى إن آخر تنسيق وقف لحد 5 سنين و9 شهور وإن الإدارة لسه هتنزّل تنسيق تانى».

ولفتت إلى أنها اختارت التقديم فى المدارس التجريبى باعتبارها الأحسن فى المستوى التعليمى ونظراً لانخفاض تكلفتها مقارنة بالمدارس الخاصة المناظرة لها: «حرام كده قاعدين على أعصابنا، وكده بنتى ضاعت عليها السنة دى عشان السن وأنا مش هقدر أدخّلها مدرسة خاصة لأنها غالية».

أما هبة الله محمد، معلمة مواد شريعة بالأزهر الشريف وتقيم بمنطقة كفر العلو بحلوان، فتقول إنها سجلت بالرقم القومى لطفلها مهاب ذى الـ5 سنوات وشهرين و18 يوماً على موقع إدارة حلوان التعليمية، وعدلت بياناته لقلة الأماكن المتاحة، لافتة إلى أنها لم تشهد تلك المشاكل من قبل عند التقديم لطفليها الأكبر منه: «الأول كنا بنقدم ورق أولادنا فى المدرسة وهما يقبلوه على طول، لكن دلوقتى الموضوع بيطوّل بالشهور وممكن مايتقبلش»، مضيفة: «ماينفعش الولد مايدخلش زى اخواته تجريبى وكمان كده مش هعرف أدخّله خاصة، لأنه هيضطر يستنى سنة كمان عشان يدخل سنة أولى كى جى بسبب سنه».