بريد الوطن| إحساس العجز.. الخصم العنيد
بريد الوطن| إحساس العجز.. الخصم العنيد
أصعب حاجة ممكن تقابلنا فى حياتنا إحساس العجز، أكيد كل واحد الإحساس ده قابله فى حياته، إنك تكون عايز حاجة معينة وتتمناها ومش عارف تاخدها، أو إن حد غالى عليك محتاجك جنبه ومش قادر تكون موجود، الحقيقة بتكون عامل زى المتكتف من إيديه ورجليه، تخيل حد عزيز عليك بيمر بظروف صعبة المرض مثلاً وانت مش قادر تعالجه أو تخفف عنه الألم، أعتقد إن الإحساس ده بيكون أصعب على الرجل، لأن الراجل بطبيعته مخلوق علشان يسعى ويتعب فى الدنيا، تخيل ييجى الوقت عليه ويكون عاجز عن الشغل، بتكون صعبة جداً على النفس، صحيح فى المواقف دى ستات بميت راجل بتقف جنب راجلها وما تخليهوش يحس بعجز، والعجز عموماً بيرجع لسببين: الأول يكون لينا دخل فيه زى الطالب اللّى قصَّر فى مذاكرته وملحقش الكلية اللى كان بيتمناها، ساعتها بيحس إنه عاجز عن الالتحاق بيها وبيكون إحساس العجز مختلط بالندم، والنوع الثانى العجز لسبب خارج عن إرادته، فى يوم تقابل حب عمرك وتتقدم ليها وتترفض، غالباً يكون الرفض لسبب مالوش علاقة بشخصك قد ما ليه علاقة بحاجات تانية زى ما هتقدر تجيب شقة تمليك ولا لأ، ساعتها إحساس العجز بيكون زى الكابوس اللى بيجيلك فى ليلة كئيبة.
محمد فهمى سويلم
محام - المنوفية
يتشرف باب "نبض الشارع" باستقبال مشاركاتكم المتميزة للنشر، دون أي محاذير رقابية أو سياسية، آملين أن يجد فيه كل صاحب رأي أو موهبة متنفساً له تحمل صوته للملايين.. "الوطن" تتلقى مقالاتكم ومشاركاتكم على عنوان البريد التالي
bareed.elwatan@elwatannews.com
