خالد عليش يغادر "نجوم FM": "أنا آسف ومش عاوز حد يزعل"
خالد عليش يغادر "نجوم FM": "أنا آسف ومش عاوز حد يزعل"
أعلن الإذاعي خالد عليش، مغادرته محطة "نجوم FM"، اليوم الأربعاء، قائلا: "للأسف وببالغ الحزن والأسى، مش هكون ضمن فريق نجوم FM السنة دي.. يعني مفيش معاك في السكة ولا موقف ولا هلي في ٢٠١٩".
وكتب "عليش" عبر حسابه الشخصي على موقع التواصل الاجتماعي "فيس بوك": "أسباب كتير هي السبب في القرار ده، منها الميعاد الصعب جدًا وخصوصا إني بشتغل حاجات تانية منها إني بمثل وغيره"، مضيفًا: "اللي يعرفني كويس في الشغل، يعرف إني بحب التجديد دايمًا ومحبش أقف عند مرحلة معينة من النجاح وخلاص".
وأضاف: "نجاحي في نجوم FM مكنش معتمد عليا أنا بس، بالعكس أنا كنت جزء صغير جدًا من منظومة اتشرفت إني اشتغلت معهم من أصغر شخص لأكبر شخص.. ولآخر لحظة علاقتنا زي الفل يعني مش ماشي بمشكلة ولا حصلت خناقة عشان الشائعات المغرضة، وكان من أهم أحلامي اللي عافرت كتير عشان أوصلها إني اشتغل مذيع في نجوم FM".
وأوضح: "أنا سايبلكم خالد جواد مكاني عشان الوحيد اللي لقيته اسمه خالد، أنا آسف لكل اللي اتعودوا يروحوا على البرنامج ولكل اللي مزاجه بيظبط مع الهلي بس هي سنة الحياة التغيير"، متابعًا: "مش عايز حد يزعل، وعايزكم تقفوا معايا في خطواتي اللي جاية، وبلاش عبارات ليه يا معلم وتعمل كده، ده أنت مكسر الدنيا ولا بصات الشفقة عشان أنا فيا اللي مكفيني.. انتظروا تفاصيل أكتر عن المشروع الإذاعي القادم في الأيام الجاية".
