"متحرقش نفسك في الشغل".. 6 علامات تدل على أنك "شخص مبالغ فيه"

12:29 م | الأربعاء 28 نوفمبر 2018

هناك الكثيرون الذين يهتمون بالعمل بشكل مبالغ فيه، ما يؤثر عليهم نفسيًا وفكريًا وجسديًا وينسى الشخص حياته الخاصة.

ويقدم مصطفى خليفة، استشاري تطوير الأعمال، العلامات التي تدل على المبالغة في العمل أو كما وصفها "بتحرق نفسك في الشغل" وكيفية تجنب ذلك والتخلص من أعباء العمل.

1. مشاكل صحية

"لو لقيت نفسك بتتعب كتير وبتطلع من تعب لتعب لازم تسأل نفسك شغلك بيأثر عليك في ده إزاي؟ وإذا كان هو السبب لحالة التعب والإرهاق المستمر اللي أنت فيها".

2. تتحول لشخص سلبي

"سواء في شغلك أو في حياتك الشخصية، تبقى عندك حالة من عدم المبالاة وأنها مبقتش فارقة، ده مؤشر مهم أنك مضغوط جدا في الشغل وده وصلك أنك مش قادر تميز بين اللي بيفرق معاك فعلا واللي مبيفرقش".

3. لا يوجد وقت لنفسك

"بتكمل شغلك في بيتك، ومش قادر تلاقي وقت لنفسك تقعد فيه أو تمارس الحاجات اللي أنت متعود تعملها، خصوصًا لو وصلت لمرحلة إنك مش قادر تميز بين البيت والشغل وأنت قاعد شغال، حاول تخلص الشغل في الشغل حتى لو هتسهر شوية بس متكملش شغلك في البيت".

4. الإهمال في نفسك والمحيطين بك

"بتهمل في حاجتك وفي نفسك سواء في اللبس أو الأكل، لازم تسأل نفسك هل ده مستاهل؟ وطبعًا قبل ما تهمل نفسك بتهمل مع عيلتك وأسرتك وبتقصر معاهم وقت ماهما محتاجينك".

5. النسيان الكثير

"مبتاخدش بالك من حاجات حواليك أو من حد بيكلمك، ده معناه أنك مشتت وشغلك ومشاكله واخدة كل تفكيرك، افصل شويه وخد إجازة".

6. أدائك بيقل

"لو لقيت أدائك وشغلك أقل من الأول وبشكل ملحوظ، ده معناه إن الضغط أثر عليك وعلى شغلك، شغلك مش هيستفيد منك وانت أدائك سيء، حتى لو انت متفاني في الشغل فبرده الشغل محتاجك بكامل طاقتك وتركيزك.