الكاتب أحمد الدريني يروي كواليس فيلم "جذور" مع عبد الرحمن أبو زهرة
الكاتب أحمد الدريني يروي كواليس فيلم "جذور" مع عبد الرحمن أبو زهرة
- الأفلام الوثائقية
- عبد الرحمن أبوزهرة
- أحمد الدريني
- DMC
- جذور
- الأفلام الوثائقية
- عبد الرحمن أبوزهرة
- أحمد الدريني
- DMC
- جذور
روى الكاتب أحمد الدريني كواليس تسجيل الفنان عبد الرحمن أبو زهرة للتعليق الصوتي لفيلم جذور، وكتب "الدريني" عبر حسابه الشخصي على "فيسبوك": "كنا بنسجل التعليق الصوتي مع الأستاذ عبد الرحمن أبو زهرة لفيلم جذور، وأول لما لقى الكلام مش متشكل شخط فينا بأداء المعلم سردينة، وقال يعني إيه مش متشكل ومعرب؟.. شريف باعني فورا وقاله أحمد هيشكله، بصيت لشريف وفي نفسي بقول ده على أساس إنك بتاع كشري ومش هتعرف تشكله يعني".
واستكمل "الدريني": "حدق بي الأستاذ أبوزهرة بنظرة الحجاج بن يوسف الثقفي وقالي وإنت إن شاء الله ضليع في قواعد اللغة العربية ياخويا؟.. فقلت له والجرجير والبقدونس كمان، فضحك.. وقعدنا ساعتين نعرب ونشكل ونراجع المعاجم، وهو بيدقق في كل حرف بيتنطق إزاي في الأفعال الثلاثية التي يجوز فيها الكسر والفتح، ومدير أعماله يتخانق معايا عشان مأخره عن التصوير بتاع مسلسله الجديد والتسجيل وصل لساعتين ونص، مش ساعة إلا ربع".
وأضاف "الدريني": "خلصنا معاه واحنا بنتشاهد وبنوجه التحية للأستاذ سيبوية في قبره، وفي الآخر بعدما لان الإعصار بين أيدينا.. كافئنا وأدى مشهد تمثيلي قدامنا وخليته قالنا تاني حتة من هاملت وقفلنا باب الاستوديو وسجدنا".
فيلم "جذور" للكاتب أحمد الدريني، ومن إخراج شريف سعيد، من إنتاج وحدة الأفلام الوثائقية، بأداء صوتي للفنان الكبير عبد الرحمن أبو زهرة، وتم التصوير فى أكثر من محافظة بامتداد مصر من الإسكندرية لأسوان في جميع أنحاء الجمهورية.
وعرض الفيلم على شاشة قناة "DMC"، وشارك فيه نخبة من أهم الشخصيات المصرية في مختلف المجالات ما بين الدين والسياسة والفن والأدب تحدثوا خلاله عن جمال مصر وطبيعتها الخلابة".
