طلاب «أولى ثانوى» يرحبون باستمرار «الامتحانات الورقية»: «متعودين عليها»

10:06 م | الثلاثاء 20 نوفمبر 2018

رحب عدد من طلاب الصف الأول الثانوى والمعلمين بقرار وزارة التربية والتعليم، بأن تكون امتحانات الفصل الدراسى الأول ورقية، نظراً لعدم اكتمال توصيل الشبكات الإلكترونية للمدارس، بالإضافة إلى تأخر وصول غالبية أجهزة «التابلت»، كما عبَّر الطلاب عن فرحتهم بنظام التقييم الجديد الذى يعتمد على عقد 4 امتحانات لكل مادة دراسية، اثنان منها فى نهاية الفصل الدراسى الأول، ويتم احتساب الدرجة الأعلى منهما للطالب، وتُحتسب الدرجة النهائية للمادة من متوسط درجتى الفصلين الدراسيين معاً، باعتبار ذلك طريقة لتصحيح أخطائهم، ومساعدتهم فى الحصول على درجات أعلى.

{left_qoute_1}

ورحَّبت رحاب عصام، طالبة بالصف الأول الثانوى العام، بمدرسة المطرية الثانوية بنات، بقرار الوزارة قائلة: «الامتحان الورقى هيبقى أحسن من التابلت، لأنه فى التابلت الأسئلة مرتبطة بوقت، فلو فيه سؤال معين كان صعب عليا وقعدت أفكر فيه ووقته خلص بيكون راح عليا خلاص، مش زى الورقى ممكن أرجع للسؤال ده فى الآخر»، لافتة إلى أن الأسئلة فى الامتحان الورقى قد يكون بعضها صعباً ولكنهم تعودوا على طريقة حلها، أما الامتحان عن طريق التابلت فجديد عليهم ويتطلب مدة أطول للتدريب عليه، وأضافت: «المدرسين كانوا بيجيبوا لينا أسئلة من بنك المعرفة على موقع الوزارة عشان يدربونا، وكنا بنلاقيها صعبة»، وتضيف أن قرار الوزارة بشأن نظام التقييم الجديد يعد مُرضياً بالنسبة لها «إحنا صحيح لسه ما نعرفش شكل الأسئلة هيبقى عامل إزاى لكن موضوع الامتحانين للمادة ده أحسن، عشان ده هيخلينا نتدرب أكتر على الأسئلة، ونعرف غلطاتنا، وكمان هيحسبوا لنا أعلى درجة».

أما فرح محمد نصر، طالبة بالصف الأول الثانوى بمدرسة الحوياتى الثانوية بنات، وتقيم بمنطقة المنيل، فتقول: «أنا مش فارق معايا الامتحان تابلت أو ورقى، المهم تكون أسئلته واضحة لينا ومباشرة، وفيه مدرسين قالوا لنا إن الامتحان لو ورقى هيبقى أصعب»، موضحة أن الفارق بين الامتحان على التابلت والورقى هو أن الأسئلة مرتبطة بتوقيت معين، لافتة إلى أن مدرستها تم تجهيزها بجميع الشبكات والأجهزة الخاصة بنظام التابلت الجديد، ولكن لم يتم العمل بها نظراً لتأخر تسلّم التابلت، وبالنسبة لنظام التقييم الجديد عبَّرت عن تخوفها من ضيق وقت الامتحان: «النظام حلو لكن إحنا خايفين تيجى أسئلة صعبة، والوقت المخصص للإجابة عليها قليل، فمثلاً امتحان الرياضة عرفنا إنه 80 دقيقة، وامتحان الفيزياء 40 دقيقة».

من جانبه، أكد «أ.س»، معلم بمدرسة جمال عبدالناصر الثانوية بكفر الشيخ، أن الامتحان الورقى أفضل من التابلت، قائلاً: «الامتحان الورقى مش هيكون بصورته المعتادة، الوزارة هتبعت كود الامتحان للمدرسة عشان تعمل له مسح ضوئى scan لتظهر ورقة الامتحان ونموذج الإجابة ويطبع مدير المدرسة الامتحان حسب عدد الطلاب»، وعن امتحان كل طالب مرتين فى الفصل الدراسى، قال: «ده فى مصلحة الطالب، هيبقى عنده فرصة تانية للامتحان والمدرسة هتحسب أعلى درجة فى الامتحانين»، وعن تدريب الأساتذة على النظام الجديد، يروى أستاذ المرحلة الثانوية: «اتدربت على النظام ده من سنتين، وأخدت شهادة معتمدة من مايكروسوفت فى استخدام برامجهم التعليمية وعمل نماذج امتحانات تفاعلية للطلبة بتحفّزهم على الفهم والاستنتاج مش الحفظ فقط».