"أمهات مصر": غياب الإشراف في بعض المدارس يتسبب في مشاجرات بين الطلاب

09:45 ص | الاثنين 19 نوفمبر 2018

قالت عبير أحمد، مؤسس اتحاد أمهات مصر للنهوض بالتعليم، إن هناك عدد كبير من المدارس بها غياب شبه تام للإشراف على الطلاب واليوم الدراسي، مشيرة إلى أن ذلك يتسبب في وقوع مشاجرات وإصابات وتصرفات غير لائقة بين الطلاب خاصة في فترة "الفسحة".

وأضافت مؤسس اتحاد أمهات مصر، إن هناك تدافعا كبير للطلاب يقع عند انتهاء اليوم الدراسي، يتسبب في حدوث إصابات للطلاب خاصة الصغار على سلالم المدرسة، وكذلك حدوث مشاجرات بين طلاب المراحل المختلفة وتعدي الكبار على الصغار في بعض المدارس، مطالبة الوزارة والمديريات التعليمية بالتشديد على المدارس في الإشراف ووجود مشرف بكل دور بالمدرسة ومتابعة الطلاب.

من جهتهم، تفاعل أولياء الأمور على صفحة اتحاد أمهات مصر للنهوض بالتعليم في "فيس بوك"، حيث قالت ولي أمر: "ابني في مدرسة خاصة بالمنصورة، وكام مرة ييجى مضروب من أولاد أكبر منه في السن، ووضع الإشراف سيء والأولاد بيضربوا بعض ومحدش بيقولهم أنتم فين بالرغم من إنها مدرسة خاصة، ولما نتكلم يقولوا الكثافة عالية وطبعًا الكثافة ارتفعت في الـ3 سنوات اللي فاتت بسبب المحافظ اللي كان موجود كل ما المدير يرفض حد ولي الأمر يجيب تأشيره من المحافظ والمدير يقبله والفصول عدت 70 طالبًا في الفصل وأصبحت مثل الحكومي كمستوى، وابني كان مره عينه هتروح لولا ستر ربنا".

وأكدت أخرى،: "والله حضرتك إحنا في مدرسة حكومية، أول الترم ما ابتدي ولا فيه إشراف ولا أي حاجه، والميس كمان بتسيب العيال في الفصل لوحدهم وبتوقف عليهم عيال من 6 ابتدائي وتنزل معرفش بتروح فين والعيال في المرواح بتبقي مدعكه واللي بيقع ويدوسوا عليه وحاجه أخر إهمال".

وتابعت ولي أمر أخرى: "لا للأسف الإشراف شكليا موجود لكن فعليا لأ، الولاد الصغيرين بيتضربوا من اللي أكبر منهم ولما بيشتكوا للأخصائيه أو مديره مش بيتم التعامل مع الشكوى إلا بوجود ولي الأمر، ابني في أولى ابتدائي وجالي مسحول قبل كدا وكل يوم يحكيلي عن أصحابه اللي بيتضربوا من ولاد أكبر منهم وطبعا في المرواح حدث ولا حرج، لولا أن بقول لإبني يستني في مكان معين كان زمانه اتهرس، مفيش نظام ولا اهتمام بالأطفال الصغيره خالص".

واستكملت ولي أمر أخرى: "يعني اسمحوا لي إني ادخل، أنا شايفة إن معظم الشكاوى إن الطلاب هما اللي بيعتدوا على بعض بالضرب، لو البيت اهتم أنه يعرف ابنه إن دي مدرسة مش ساحة فرد عضلات، المدرس هيعمل ايه ولا ايه، أصلا المدارس المفروض يكون فيها مشرفين وتبقى دي شغلتهم".

وقالت أخرى: "احنا في مدرسة تابعة لإدارة عين شمس التعليمية، ماعندناش وجود أصلا لمشرفين دور والنتيجة طبعا خناقات بين طلبة الإعدادي والثانوي واخرهم خناقة كانت كارثة بين الطلبة وكان فيها إصابات، ودي كمان مدرسة مشتركة وفيها اطفال من كي جي وابتدائي وممكن يتأذوا".

وفي المقابل قالت ولي أمر أخرى: "اللهم لا حسد، مدرستنا إلى حد ما الإشراف فيها على أكمل وجه، وفي كثافة عددية مع الطلاب وفى اهتمام فعلا من أول حصانه Kg لحد الإعدادي من أول دخول الطالب من باب المدرسة حتى وقوفه في الطابور إلى صعوده إلى نزوله لفسحه حتى نزوله أثناء الحصص المعامل والألعاب في الفناء حتى خروجه، بجد أجمل وأحسن حاجة في مدرستنا النظام والإشراف أمانة".