بريد الوطن| ولا تنسوا الفضل بينكم
بريد الوطن| ولا تنسوا الفضل بينكم
مشاهد كتيرة بنشوفها فى حياتنا وبمجرد ما بتنتهى ما بنفتكرهاش، ومشاهد تانية بتفضل معلمة جوانا ومش بننساها، مشهد شفته بعينى من دنيا الواقع، الحقيقة مش جديد، الأبطال كتير، بس المكان والزمان مختلفين، والبشاعة واحدة، المكان محكمة الأسرة، نزاع بين زوجين، الزوجة موجودة برفقة طفلها عمره تقريباً سنة ونصف، والزوج موجود، أعمارهم تقريباً فى حدود 30 سنة، باين جداً إن ده طفلهم الوحيد، وإن سنوات الجواز قليلة بينهم، الزوج عاوز يشيل ابنه ويحضنه، والزوجة تمنعه، يتطور الأمر للتراشق بالألفاظ والتدخل بالأيدى، والسؤال مش: ليه أعداد الطلاق والنزاعات الزوجية وصلت للرقم المخيف ده؟ إنما السؤال: ليه مش بنفتكر الحاجات الحلوة اللى كانت موجودة بينا؟ ليه فى لحظات الغضب بنكسر كل حاجة ممكن نحتاجها لما نكبر؟ كلامى مش فى الجواز والطلاق بس، كلامى عام فى كل أمور حياتنا، بنشوف ناس كتير مش بنكلمهم بالسنين لمجرد خلافات مهما كانت شديدة، وقتها، بس مع مرور الوقت بنكتشف إنها مش مستاهلة إننا نضيع الوقت ده وإحنا بعاد عن بعض، كم جار مخاصم جاره، وفيه بينهم مشاكل ونزاع قضائى؟ وكم أخ مش بيكلم أخوه عشان بس زوجاتهم مش بيرتاحوا لبعض؟.
محمد فهمى سويلم
محام - المنوفية
يتشرف باب "نبض الشارع" باستقبال مشاركاتكم المتميزة للنشر، دون أي محاذير رقابية أو سياسية، آملين أن يجد فيه كل صاحب رأي أو موهبة متنفساً له تحمل صوته للملايين.. "الوطن" تتلقى مقالاتكم ومشاركاتكم على عنوان البريد التالي
bareed.elwatan@elwatannews.com
