3D وHD آخر اختراعات الـ«ميك آب»: هتستلم العروسة مفيهاش غلطة

12:26 ص | الجمعة 01 يونيو 2018

ابتكارات عديدة تلحق بأدوات التجميل كل يوم، ويتنافس خبراء التجميل فى طرح صيحات جديدة تجذب هواة الأناقة والجمال، آخرها «ميك آب 3D»، الذى روج له البعض بأسعار مرتفعة.

«3D بـ2300 جنيه، والـ3D max بـ8000 جنيه، والـ3d effect بـ4500 جنيه، والـHD بـ3300 جنيه»، باقات للـ«ميك آب» انتشرت على مواقع التواصل الاجتماعى، أثارت غضب ودهشة كثير من المقبلات على الزواج، نظراً لتكلفتها الباهظة.

«الـ3D بيختلف عن غيره فى إنه مناسب لأصحاب البشرة الدهنية، فبسبب لمعان بشرتهم مش بنحتاج نحطلهم هاى لايت، النوع ده من الميك آب بيبرز الملامح بشكل كبير»، بحسب نانسى عزب، خبيرة تجميل.

وتفسر خبيرة التجميل، ابتكار أنواع مختلفة من أدوات التجميل وبشكل متلاحق، بأنه أمر طبيعى شأنه شأن باقى السلع والخدمات: «دائماً بنطوّر فى الميك آب، كل واحد بيوظف الميك آب بالشكل اللى شايفه مختلف عن غيره، وكل خبير تجميل وله طريقته».

ضحك على الناس، هكذا ترى خبيرة التجميل خلود سعيد، فالمهارة هى التى تنجح الـ«ميك آب» وليس أدوات التجميل: «كل المسميات دى من إبداعاتهم. الميك آب اللى بعمله كله واحد، ومفيش حاجة اسمها 3D، لأن أدواته كلها معروفة، وأى خبير تجميل شاطر يعرف إزاى يتعامل مع البشرة اللى قدامه، وتطلع العروسة من تحت إيده مفيهاش غلطة».